გერმანიის ბუდენსტაგის წევრი, რობინ ვაგენერი "გრანტების შესახებ" კანონში შეტანილ ცვლილებებს სოციალურ ქსელში გამოეხმაურა. მისი განმარტებით, ეს საკანონმდებლო ცვლილებები, დემოკრატიულ სამოქალაქო საზოგადოებასა და პოლიტიკურ ოპოზიციაზე, კიდევ ერთ პირდაპირ თავდასხმას წარმოადგენს.

რობინ ვაგენერი მთავრობას საქართველოში ყველა პოლიტიკური პატიმრის დაუყოვნებლივ და უპირობო გათავისუფლებისკენ მოუწოდებს და აღნიშნავს, რომ მტკიცედ დგანან ქართველი ხალხის გვერდით, რომელიც რისკების მიუხედავად, დაუღალავად აგრძელებს ბრძოლას თავისი ქვეყნის თავისუფლებისთვის, დემოკრატიისა და ევროპული მომავლისთვის.

"საქართველოს ავტორიტარი მმართველები სულ უფრო მეტად გარდაქმნიან სამხრეთ კავკასიაში ოდესღაც დემოკრატიული იმედის მნათობ ქვეყანას ერთპარტიულ დიქტატურად, რითაც ქვეყნის ევროპულ მომავალს ანადგურებენ.

დღეს საქართველოში მიღებული საკანონმდებლო ცვლილებები წარმოადგენს კიდევ ერთ პირდაპირ თავდასხმას დემოკრატიულ სამოქალაქო საზოგადოებასა და პოლიტიკურ ოპოზიციაზე. სამართლის უზენაესობა, რომელიც ისედაც ძლიერ დასუსტებული იყო, კიდევ უფრო ილახება.

"გრანტების შესახებ კანონის" ახალი დებულებების თანახმად, სამოქალაქო საზოგადოების ორგანიზაციებსა და საერთაშორისო პარტნიორებს შორის ნებისმიერი თანამშრომლობა ახლა მთავრობის წინასწარ თანხმობას ექვემდებარება და, ფაქტობრივად, საყოველთაო ეჭვქვეშაა დაყენებული. პირებს, რომლებმაც მიიღეს უცხოური დაფინანსება, რვა წლის განმავლობაში ეკრძალებათ პოლიტიკურ პარტიასა თუ მოძრაობაში გაწევრიანება და, ამგვარად, ისინი განზრახ არიან გარიყულნი პოლიტიკური კონკურენციიდან. ახლად შემოღებული სისხლის სამართლის დანაშაული — "ექსტრემიზმი კონსტიტუციური წესრიგის წინააღმდეგ" — იმდენად ბუნდოვნად არის ფორმულირებული, რომ ქართული ოცნების ლეგიტიმური კრიტიკაც კი შეიძლება მოექცეს მის ფარგლებში.

უფრო მეტიც, ამჟამად საქართველოში პოლიტიკურად მოტივირებული მიზეზების გამო 100-ზე მეტი ადამიანია დაპატიმრებული, მათ შორის ჟურნალისტები, როგორიცაა სახაროვის პრემიის ლაურეატი მზია ამაღლობელი, ასევე წამყვანი ოპოზიციონერი პოლიტიკოსები. ქართული ოცნება სისტემატურად ცდილობს ქვეყნის შიგნით კრიტიკოსების დაშინებას, დაპატიმრებასა და გაჩუმებას.

მოვუწოდებ საქართველოში ყველა პოლიტიკური პატიმრის დაუყოვნებლივ და უპირობო გათავისუფლებისკენ. ჩვენ მტკიცედ ვდგავართ ქართველი ხალხის გვერდით, რომელიც უდიდესი რისკების მიუხედავად, დაუღალავად აგრძელებს ბრძოლას თავისი ქვეყნის თავისუფლებისთვის, დემოკრატიისა და ევროპული მომავლისთვის", — წერს გერმანიის ბუდენსტაგის წევრი.

შეგახსენებთ, "გრანტების შესახებ კანონში ცვლილებების" მიხედვით, სისხლის სამართლის წესით დასჯადი ხდება საქართველოს კონსტიტუციური წყობილების ან კონსტიტუციური ორგანოების არაღიარება და 3 წლამდე პატიმრობით ისჯება, ამას გარდა დასჯადი ხდება გრანტების შესახებ კანონის დარღვევა და ბიზნესსუბიექტის პოლიტიკური აქტივობა.

ასევე სისხლის სამართლის კოდექსს დაემატა ახალი მუხლი — "ექსტრემიზმი კონსტიტუციური წყობილების წინააღმდეგ".

ამ მუხლის დარღვევა 3 წლამდე თავისუფლების აღკვეთას, ჯარიმას ან გამასწორებელ სამუშაოს ითვალისწინებს.

კანონს ხელი მიხეილ ყაველაშვილმა 4 მარტს მოაწერა, რის შემდეგ ის ძალაშია.