იურისტი საბა ბრაჭველი "გრანტების შესახებ" კანონში შეტანილ ცვლელბებს სოციალურ ქსელში გამოეხმაურა. მისი თქმით კანონში ცვლილებები ქართველი ხალხის დანარჩენი მსოფლიოსგან იზოლაციისთვის კიდევ ერთი ნაბიჯია. მისივე განმარტებით, ოცნების მიზანია, რომ ქართველ ხალხს ზოგადად, ევროპული აზროვნების და ცხოვრების სტილზე არ ჰქონდეს წვდომა.ის იმასაც წერს, რომ "ამ კანონით გათვალისწინებული შეზღუდვები და სასჯელები უპრეცედენტოა რუსეთის, ბელარუსის და აზერბაიჯანისთვისაც კი."

"ახლახანს მიღებული ცვლილებები გრანტების კანონში კიდევ ერთი ნაბიჯია ქართველი ხალხის დანარჩენი მსოფლიოსგან იზოლაციისთვის.

ოცნება მიზნად ისახავს, რომ ქართველ ხალხს არ ჰქონდეს წვდომა ევროპულ განათლებაზე (ამიტომ ხდება აკადემიის სისტემური დემონტაჟი), ევროპულ რესურსებზე (ამიტომ ემუქრებიან ამ კანონით ნებისმიერ უცხოელს ექვსწლიანი ციხით, ქართველების დახმარება თუ გადაწყვიტა), ევროპულ უვიზო მიმოსვლაზე (რომლის შესაჩერებლადაც ყველა ნორმას და ხელშეკრულებას არღვევენ, რაც შეუძლიათ) და, ზოგადად, ევროპული აზროვნების და ცხოვრების სტილზე (რის გამოც გამოაცხადეს მთავარი მტრად ლიბერალური დემოკრატია).

ეს კანონი მიზნად ისახავს, რომ ამ ქვეყანაში, რომელიმე მოქალაქეს დახმარების მიღება თუ სურს, მხოლოდ ოცნების გავლით, ოცნებასთან ხვეწნით შეეძლოს ეს. კანონი უკვე ქმნის ფორმალური დასჯადობის საფუძველს ბიზნესის მიერ გასაცემი უფასო დახმარებისა და ქველმოქმედებისთვის, უცხოეთის მოქალაქეების მიერ ფულის გადმორიცხვის (ან თუნდაც წამლის გამოგზავნისთვის), და მოსალოდნელია, რომ მოგვიანებით, როცა საკმარისად მყარად იგრძნობენ თავს, ემიგრანტების თანხების გაკონტროლებასაც სულ სხვანაირად დაიწყებენ.

აღარაფერს ვამბობ ათიათასობით ადამიანისთვის პოლიტიკური პარტიის წევრობის, ან მხარდაჭერის აკრძალვაზე.

და რაკი აშკარაა, რა აწუხებს ოცნებას და რის აკრძალვას ითხოვს, ისიც აშკარაა, რა უნდა გავაკეთოთ ამის საწინააღმდეგოდ.

თორემ, წმინდად საკანონმდებლო კუთხით თუ შევხედავთ, ამ კანონით გათვალისწინებული შეზღუდვები და სასჯელები უპრეცედენტოა რუსეთის, ბელარუსის და აზერბაიჯანისთვისაც კი. თუ გაუვიდათ, შემდეგი გაჩერება თურქმენეთი და ერიტრეა იქნება",— დაწერა საბა ბრაჭვლმა.

შეგახსენებთ, "გრანტების შესახებ კანონში ცვლილებების" მიხედვით, სისხლის სამართლის წესით დასჯადი ხდება საქართველოს კონსტიტუციური წყობილების ან კონსტიტუციური ორგანოების არაღიარება და 3 წლამდე პატიმრობით ისჯება, ამას გარდა დასჯადი ხდება გრანტების შესახებ კანონის დარღვევა და ბიზნესსუბიექტის პოლიტიკური აქტივობა.

ასევე სისხლის სამართლის კოდექსს დაემატა ახალი მუხლი — "ექსტრემიზმი კონსტიტუციური წყობილების წინააღმდეგ".

ამ მუხლის დარღვევა 3 წლამდე თავისუფლების აღკვეთას, ჯარიმას ან გამასწორებელ სამუშაოს ითვალისწინებს.

კანონს ხელი მიხეილ ყაველაშვილმა 4 მარტს მოაწერა, რის შემდეგ ის ძალაშია.