ოცნების პრემიერი ირაკლი კობახიძე აცხადებს, რომ "იმედს" და "პოსტვ"-ის სანქციები დაუწესა "დიფ სტეიტმა" და არა დიდმა ბრიტანეთმა, მაგრამ ინსტრუმენტად გამოიყენეს ბრიტანული ბიუროკრატია. ამის შესახებ მან "ოცნების" პოლიტსაბჭოს სხდომის დასრულების შემდეგ ჟურნალისტებთან საიბრისას თქვა.

"დასანქცირებასთან დაკავშირებით მე დარწმუნებული ვარ იყო კოორდინაცია "სიფ სტეიტიდან". ეს არ არის დიდი ბრიტანეთის გადაწყვეტილება. ჩვენ ძალიან დიდ პატივს ვცემთ ამ ქვეყანას. ეს იყო ბრიტანული ბიუროკრატიის გადაწყვეტილება. ევროპული ბიუროკრატიაც იმართება იგივე ხელიდან, რასაც პრეზიდენტი ტრამპი უწოდებს "დიფ სტეიტს", ჩვენ სხვა რამეს ვუწოდებთ, თუმცა ერთი და იმავეს ვგულისხმობთ. რაც შეეხება აშშ-ს თემას, ამაზე ჩვენ გავაკეთეთ განცხადება", — თქვა ირაკლი კობახიძემ

ჟურნალისტის კითხვაზე — "ანუ სანქციების დაწესების გადაწყვეტილება მიიღო "დიფ სტეიტმა" და არა დიდმა ბრიტანეთმა?," კობახიძემ უპასუხა:

"დიახ, რა თქმა უნდა. ასეა, რა თქმა უნდა. მაგრამ ბრიტანული ბიუროკრატია იქნა გამოყენებული ამის ინსტრუმენტად".

ირაკლი კობახიძემ ჟურნალისტებთან საუბრისას ისიც თქვა, რომ დიდი ბრიტანეთის ელჩი საგარეო უწყებაში განმარტებისთვის დაიბარეს და მის გაწვევას არ აპირებენ.

"გამომდინარე იქიდან, რომ ჩვენთვის ძვირფასია დიდი ბრიტანეთი როგორც გამორჩეული ისტორიის მქონე სახელმწიფო და ჩვენთვის ძვირფასია ბრიტანელი ხალხი. რაც შეეხება ელჩის დაბარებას, ეს არ არის მხოლოდ დიპლომატიური დემარშის ფორმა, ამას პრაქტიკული დატვირთვაც აქვს, ჩვენ მოვითხოვეთ ინფორმაციის გაზიარება იმასთან დაკავშირებით თუ რას დაეფუძნა ორი ტელეკომპანიის სანქცირება, ნული ინფორმაცია, ნული ფაქტები ამასთან დაკავშირებით. ეს მეტყველებს კიდევ ერთხელ ამ მდგომარეობის ტრაგიკულობაზე", — განაცხადა ირალი კობახიძემ.

შეგახსენებთ, რომ დიდმა ბრიტანეთმა სამთავრობო პროპაგანდისტული "იმედი" და "პოსტვ" 24 თებერვალს დაასანქცირა. რის შემდეგაც ოცნების საგარეო უწყებაში დაიბარეს დიდი ბრიტანეთის ელჩი გარეთ უორდი. შეხვედრის დასრულების შემდეგ საგარეო უწყების ხელმძღვანელმა, მაკა ბოჭორიშვილმა განაცხადა, რომ "40 წუთის განმავლობაში არ მოუსმენია არც ერთი არგუმენტი, რომელიც "იმედის" და "პოსტვ"-ის დასანქცირებას გაამართლებდა.