ავსტრიის სასამართლომ 37 წლის მოყვარული ალპინისტი დამნაშავედ ცნო გაუფრთხილებლობით მკვლელობაში, მას შემდეგ, რაც მან გასულ წელს თავისი შეყვარებული ავსტრიის მწვერვალზე დატოვა და დახმარების მოსაყვანად წავიდა, როცა პარტნიორი გზას ვეღარ აგრძელებდა. ქალი ჰიპოთერმიის შედეგად გარდაიცვალა.

ეს საქმე უჩვეულოა, რადგან მიუხედავად იმისა, რომ ალპინიზმში უბედური შემთხვევები ხშირია, ასეთი შემთხვევების გამო სისხლის სამართლის დევნა იშვიათად ხდება.

ინსბრუკის სასამართლომ კაცს, თომას პ.-ს, 2025 წლის იანვარში გაუფრთხილებლობით ქალის სიკვდილის გამოწვევისთვის, დღეს მიუსაჯა ხუთთვიანი პირობითი პატიმრობა და 9,400 ევროს ჯარიმა. აღნიშნული დანაშაულისთვის მაქსიმალური სასჯელი სამ წლამდე პატიმრობაა.

სასამართლო პროცესმა მაღალმთიან გარემოში სამართლებრივი პასუხისმგებლობის ფარგლებზე გააჩინა კითხვები, ამ თავისთავად საშიშ სივრცეში, ალპინისტები, როგორც წესი, საკუთარი რისკით მოქმედებენ.

სასამართლოს ინფორმაციით, რთული დღის შემდეგ, როცა წყვილი დაგეგმილ გრაფიკს მნიშვნელოვნად ჩამორჩა, 33 წლის ქალი უკიდურესად დაღლილი იყო და მწვერვალისკენ გზას ვეღარ აგრძელებდა. ეს მოხდა ღამით, ძლიერ ყინვაში, გროსგლოკნერის მწვერვალამდე დაახლოებით 50 მეტრში.

სასამართლომ დაადგინა, რომ ბრალდებულმა ქალი ძლიერი ქარის პირობებში დაუცველად დატოვა, არ შემოახვია მას გადაუდებელი თბილი პლედი და არ გამოიყენა ბივაკის ჩანთა (წყალგაუმტარი, ერთადგილიანი საგანგებო საფარი), მიუხედავად იმისა, რომ ეს აღჭურვილობა ქალს ზურგჩანთაში ჰქონდა.

სასამართლოში მან ვერ ახსნა, რატომ მოიქცა ასე და თქვა, რომ სიტუაცია ძალიან სტრესული იყო.

სამთო პოლიციასთან მოკლე სატელეფონო ზარის შემდეგ სამაშველო ოპერაცია არ დაწყებულა, რადგან პოლიციის თქმით, მას მკაფიოდ არ უთქვამს, რომ დახმარება სჭირდებოდათ. მოგვიანებით კი პოლიციის დამაზუსტებელ ზარებსაც და მესიჯებსაც არ უპასუხა, რომლებშიც ეკითხებოდნენ, სჭირდებოდათ თუ არა დახმარება. ბრალდებულმა განმარტა, რომ ტელეფონი, ელემენტის დაზოგვის მიზნით, ფრენის რეჟიმზე ჰქონდა.

პროკურორებმა მოწმედ მოიწვიეს მისი ყოფილი პარტნიორი, რომელმაც სასამართლოს მოუყვა, რომ რამდენიმე წლის წინ იმავე მწვერვალზე ისიც არის ნამყოფი ბრალდებულთან ერთად, სადაც გზაში იკამათეს, რის შემდეგაც პარტნიორმა ისიც დატოვა ღამით მარტო.

3,798 მეტრის სიმაღლის გროსგლოკნერზე ყოველწლიურად 7,000-ზე მეტი ადამიანი ადის. მარშრუტზე დაახლოებით 200 ალპინისტის სიკვდილია დაფიქსირებული, თუმცა არცერთ შემთხვევას არ მოჰყოლია ისეთი დიდი ყურადღება, როგორიც კერსტინ გ.-ის გარდაცვალებას.

საქმის მოსამართლემ, ნორბერტ ჰოფერმა, რომელიც თავად გამოცდილი ალპინისტია, განაცხადა, რომ ბრალდებულს უნდა გაეაზრებინა, რომ მისი შეყვარებული ვერ შეძლებდა ასვლის დასრულებას იქამდე, ვიდრე სიტუაცია კრიტიკული გახდებოდა.

"მე თქვენ მკვლელად არ აღგიქვამთ. მე თქვენ გულქვად არ მიმაჩნიხართ", — უთხრა მოსამართლემ თომას პ.-ს განაჩენის გამოცხადებისას და აღნიშნა, რომ ის მართლაც დახმარების მოსაყვანად წავიდა.

თუმცა მან დაამატა, რომ ბრალდებული "გალაქტიკური საზომით" უკეთესი ალპინისტია, ვიდრე მისი მისი შეყვარებული და ქალმა მას საკუთარი უსაფრთხოება ანდო.

"მინდა ვთქვა, რომ ძალიან, ძალიან ვწუხვარ", — განაცხადა ბრალდებულმა, რომელიც პროცესის განმავლობაში თავს უდანაშაულოდ მიიჩნევდა.