ბერლინის კინოფესტივალში მონაწილე 80-ზე მეტმა მსახიობმა, რეჟისორმა და სხვა არტისტმა, მათ შორის ტილდა სუინტონმა და ხავიერ ბარდემმა, სამშაბათს გამოქვეყნებულ ღია წერილს მოაწერეს ხელი და ორგანიზატორებს მოუწოდეს, მკაფიო პოზიცია დააფიქსირონ ისრაელის ომზე ღაზაში.

"მოვუწოდებთ ბერლინალეს, თავისი მორალური ვალდებულება შეასრულოს და მკაფიოდ განაცხადოს, რომ ეწინააღმდეგება ისრაელის გენოციდს, კაცობრიობის წინააღმდეგ ჩადენილ დანაშაულებსა და პალესტინელების წინააღმდეგ ჩადენილ ომის დანაშაულებს", — ნათქვამია ღია წერილში, რომელიც სრულად ჟურნალ Variety-ში გამოქვეყნდა.

ადამიანის უფლებათა მრავალი ექსპერტი, მეცნიერი და გაეროს საგამოძიებო კომისია აცხადებს, რომ ისრაელის თავდასხმა ღაზაზე გენოციდს უტოლდება. ისრაელი კი საკუთარ ქმედებებს თავდაცვად მიიჩნევს, 2023 წლის ოქტომბერში ჰამასის თავდასხმის შემდეგ.

"შეძრწუნებულები ვართ ბერლინალეს ინსტიტუციური დუმილით", — წერია წერილში, რომელსაც ასევე მოაწერეს ხელი მსახიობებმა ადამ მაკქეიმ, ალია შავქათმა და ბრაიან კოქსმა, ასევე რეჟისორებმა მაიკ ლიმ და ლუკას დონტმა.

წერილში აღნიშნულია, რომ ორგანიზატორებმა არ დააკმაყოფილეს მოთხოვნები, გაეკეთებინათ განცხადება, რომელიც დაადასტურებდა პალესტინელების სიცოცხლის უფლებას და აღიარებდა არტისტების უფლებას, ამ საკითხზე თავისუფლად ისაუბრონ.

"ეს არის მინიმუმი, რაც მათ შეუძლიათ და უნდა გააკეთონ", — ნათქვამია წერილში.

ბერლინის კინოფესტივალი თავის კოლეგებთან (ვენეციისა და კანის ფესტივალებთან შედარებით) ყველაზე პოლიტიზებულად ითვლება და ამაყობს იმით, რომ ეკრანზე გამოაქვს სხვაგან ნაკლებად წარმოდგენილი თემები და ახალგაზრდა ტალანტები.

თუმცა, ის არაერთხელ გამხდარა პრო-პალესტინელი აქტივისტების კრიტიკის სამიზნე იმის გამო, რომ ღაზაზე პოზიცია არ დაუფიქსირებია, მაშინ როცა უკრაინის ომსა და ირანში არსებულ ვითარებაზე განცხადებები გააკეთა.

გასულ წელს 5 000-ზე მეტმა მსახიობმა და პროდიუსერმა, მათ შორის ჰოლივუდის ვარსკვლავებმაც, ხელი მოაწერეს პირობას, არ ეთანამშრომლათ ისრაელის კინოინსტიტუციებთან, რომლებსაც ისინი პალესტინელების მიმართ ძალადობაში თანამონაწილედ მიიჩნევდნენ. მოგვიანებით სტუდია Paramount-მა ეს ინიციატივა დაგმო და განაცხადა, რომ მსგავს ძალისხმევას არ ეთანხმება.

სამშაბათს გამოქვეყნებულ წერილში ასევე გაკრიტიკებულია წლევანდელი ჟიურის თავმჯდომარის, გერმანელი რეჟისორის ვიმ ვენდერსის განცხადებები, რომლის თქმითაც კინოს შემქმნელები პოლიტიკისგან უნდა შორს იყვნენ. "ამ ორს ერთმანეთისგან ვერ გავმიჯნავთ", — წერია წერილში.

ვენდერსის კომენტარებმა ინდოელი მწერალი არუნდატი როი, რომელმაც 1997 წელს ბუკერის პრემია" მიიღო რომანისთვის წვრილმანების ღმერთი, აიძულა ფესტივალი დაეტოვებინა.

ასევე ნახეთ: ღაზაზე ჟიურის განცხადებების გამო არუნდატი როიმ ბერლინალე დატოვა

პასუხად, ფესტივალის დირექტორმა ტრიშია ტატლმა შაბათს გაავრცელა განცხადება, სადაც დაიცვა არტისტების გადაწყვეტილება, არ გაეკეთებინათ კომენტარი პოლიტიკურ საკითხებზე.

"ხალხი ბერლინალეზე სიტყვის თავისუფლებას ითხოვდა. ბერლინალეზე სიტყვის თავისუფლება არსებობს", — თქვა მან.

"მაგრამ სულ უფრო ხშირად, კინოს შემქმნელებს სთხოვენ პასუხი გასცენ ნებისმიერ შეკითხვას, რომელიც მათ უსვამენ", — დაწერა მან, — "და აკრიტიკებენ, თუ არ უპასუხებენ, ან თუ უპასუხებენ და მათი პასუხი 'არ მოგვწონს'".