ოცნების ხელისუფლების პრემიერმინისტრის, ირაკლი კობახიძის განცხადებით, Eagle Hill-ის პროექტის კრწანისის ტერიტორიაზე ბინების გაყიდვა უკვე დაიწყო.

კობახიძის მტკიცებით 257 გაყიდული ბინიდან 147 ქართველმა შეიძინა, ხოლო 110 — უცხოელმა. ოცნების პრემიერმა ასევე დასძინა, რომ "ოპოზიციას არაბიზაციის დაანონსებული პროცესი ჩაუვარდა", რადგან 110 უცხოელი მყიდველიდან მხოლოდ 8 იყო არაბი.

ოცნების პრემიერმინისტრის განმარტებით, ოპოზიცია "ათჯერ ასცდა იმ რეალობას", თუ რა ფასად გაიყიდებოდა ბინა არაბული პროექტის ფარგლებში და მოცემული ფასი ქართველი მყიდველისთვისაც ხელმისაწვდომია.

"ეს არის ყველაზე მაშტაბური ინვესტიცია. ბინების წინასწარი გაყიდვები დაიწყო კრწანისის ტერიტორიაზე. თქვენ გახსოვთ, რომ ოპოზიციას ჰქონდა დაანონსებული 15 ათას დოლარიანი ფასი. მათ ინვესტორზე უკეთ იცოდნენ რა ფასით გაიყიდებოდა ბინები და სახლები კრწანისის ტერიტორიაზე, თუმცა ოპოზიციის ანონსის საწინააღმდეგოდ, საწყისი ფასი გარემონტებულ ბინებზე იყო 1650 დოლარი. დაახლოებით ათჯერ ასცდნენ იმ რეალობას, რომელიც სინამდვილეში იყო დაგეგმილი. შესაბამისად, ეს ბინები საშუალო ქართველი მყიდველისთვისაც იყო ხელმისაწვდომი. ჩვენ მოგვაწოდეს სტატისტიკური ინფორმაცია. გახსოვთ რამხელა კამპანია იყო აგებული ამ თემასთან დაკავშირებით. "არაბიზაციის“ ტერმინი შემოიტანეს და ა.შ. აცხადებდნენ, რომ პრაქტიკულად ქართველები ვერ იყიდდნენ ბინებს და მთლიანად გაიყიდებოდა არაბებზე, აქაც სტიგმატიზაციის მცდელობა ჰქონდათ. მთლიანად არაბები იყიდდნენ ბინებს, ასეთი იყო მათი პროგნოზი. გაიყიდა 257 ბინა, საიდანაც 147 ბინა იყიდეს ქართველებმა და 110 ბინა იყიდეს უცხოელებმა. რომ არა ეს ისტერიული კამპანია, დარწმუნებული ვარ, ქართველი მყიდველების წილი ბევრად უფრო მაღალი იქნებოდა და დარწმუნებული ვარ, მომავალში ეს წილი გაიზრდება.

რაც შეეხება ე.წ. არაბიზაციას, არაბული ქვეყნების მოქალაქეებმა 257 ბინიდან მხოლოდ 8 ბინა შეიძინეს, რაც ნიშნავს იმას, რომ არაბიზაციის დაანონსებული პროცესი იმთავითვე ჩაუვარდა ჩვენს ოპოზიციას. მინდა ყველას შევახსენო, რომ ეს უპრეცედენტო ინვესტიცია საქართველოს ეკონომიკას გაამდიდრებს 11 მლრდ ლარით და ჩვენს ბიუჯეტს ყოველწლიურად შემატებს საშუალოდ 700 მლნ ლარს, არაფერს ვამბობ იმაზე, რომ ტურიზმის წახალისებისთვის არის მნიშვნელოვანი. ასევე ბევრი თვალსაზრისით არის მნიშვნელოვანი ეს ინვესტიცია ჩვენი ეკონომიკის განვითარებისთვის. საბოლოდ, ეკონომიკის განვითარება, რა თქმა უნდა, აისახება ჩვენი მოქალაქეების კეთილდღეობაზე," — თქვა კობახიძემ.

შეგახსენებთ, 2025 წლის იანვარში ოცნების ხელისუფლების მთავრობის ადმინისტრაციამ გაავრცელა ინფორმაცია იმის შესახებ, რომ დეველოპერული კომპანია Emaar Properties/Eagle Hills-ი საქართველოში $6 მლრდ მოცულობის ინვესტიციას განახორციელებდა. თანამშრომლობის მემორანდუმი კომპანიასა და ქართულ მხარეს შორის აბუ-დაბიში ოცნების ხელისუფლების პრემიერმინისტრ ირაკლი კობახიძის ვიზიტის ფარგლებში გაფორმდა.

ოცნების ხელისუფლების ეკონომიკისა და მდგრადი განვითარების მინისტრმა, მარიამ ქვრივიშვილმა და კომპანია "იგლ ჰილსის" დამფუძნებელმა, მოჰამედ ალი ალაბარმა საინვესტიციო შეთანხმებასა და საერთო კომპანიის ჩამოყალიბების შესახებ ხელშეკრულებას 2025 წლის 22 ოქტომბერს მოაწერეს ხელი, რომლის ფარგლებშიც "იგლ ჰილსი" თბილისსა და გონიოში დეველოპერულ პროექტებს განახორციელებს. მარიამ ქვრივიშვილის შეფასებით, მნიშვნელოვანია, რომ შეთანხმების თანახმად, საქართველო პროექტების პარტნიორად და კომპანიის 33%-იანი წილის თანამესაკუთრედ განისაზღვრა.