საქართველოში სასმელების პლასტმასის ბოთლებით გაყიდვა შეიძლება აიკრძალოს. ამის შესახებ გარემოს დაცვის მინისტრის მოადგილემ, სოლომონ პავლიაშვილმა, 9 თებერვალს საზოგადოებრივი მაუწყებლის ეთერში, გადაცემაში "ბიზნესპარტნიორში" ისაუბრა.

პავლიაშვილის თქმით, მიღებული რეგულაციის მეორე ეტაპის ფარგლებში, 1-ელი ივლისიდან პლასტმასის ბოთლებით სასმლის გაყიდვა აეკრძალებათ კვების ობიექტებსა და სასტუმროებს, ხოლო დაახლოებით 1 წლის შემდეგ, საქართველოში პლასტმასის ბოთლებში სასმლის გაყიდვა სრულიად აიკრძალება.

პავლიაშვილმა ასევე აღნიშნა, როომ ამ ბანიჯით, ექსპორტი არ იზღუდება, და შეზღუდვა შიდა ბაზარს შეეხება. მისივე თქმით, აღნიშნული ცვლილება არ შეეხება მზესუმზირის ზეთს, რადგან სამომხმარებლო კალათაში არსებულ ამ პროდუქტზე მსგავსი შეზღუდვა ფასის ზრდას გამოიწვევს.

მისივე განმართებით, შეზღუდვა არ შეეხება წყალს 10 ლიტრზე მეტი შეფუთვით.

პავლიაშვილის განმარტებით, მოკლევადიან პერიოდში ეს ნაბიჯი სასმლის ფასების გაძვირებას გამოიწვევს, თუმცა გრძელვადიან პერიოდში ფასები შემცირდება.

"რა თქმა უნდა, ერთჯერადი შეხედვით გაძვირდება [სასმელი], მაგრამ გრძელვადიან პერიოდში მრავალჯერადი გამოყენების ჭურჭლით, აი, ვისაც შეუძლია კარგად გამიგებს მსმენელი, ფასები უფრო მინიმიზირდება, იმიტომ რომ თუ მრავალჯერად ჭურჭელს გამოიყენება შეიძლება ბევრჯერ, და ერთჯერადის გამოყენებას შეიძლება მხოლოდ ერთხელ. გრძელვადიან პერიოდში მისი ფასები მინიმიზირდება და უფრო შეიძლება ეფექტიანიც იყოს. ამ გადასახედიდან შეიძლება რთული იყოს, მაგრამ ეს არის ცნობიერების ნაწილი და ამ ცნობიერებაზე სამუშაო გვაქვს ყველას. მე ვფიქრობ, რომ საბოლოოდ ეს ყველაფერი დაიხვეწება და ქვეყანას ექნება პოზიტიური შედეგი.", — თქვა მან.