ევროკავშირი განიხილავს უპრეცედენტო გეგმას, რომლის მიხედვითაც უკრაინამ შეიძლება ევროკავშირის ნაწილობრივი წევრობა 2027 წლიდან მიიღოს. მიზანი უკრაინის ევროპასთან მტკიცედ დაკავშირება და რუსეთის გავლენის შემცირებაა. ამის შესახებ ინფორმაციას POLITICO ავრცელებს.

გეგმის მიხედვით, უკრაინა ევროკავშირში ჯერ პოლიტიკურად შევა, ხოლო სრული წევრობისთვის საჭირო რეფორმებს შემდეგ დაასრულებს. POLITICO წერს, რომ ამ მოდელს არაოფიციალურად "პირიქითა გაფართოებას" (reverse enlargement) უწოდებენ და ის ემანუელ მაკრონის "მრავალსიჩქარიან ევროკავშირს" ეფუძნება.

პრეზიდენტი ვოლოდიმირ ზელენსკი მოითხოვს, რომ 2027 წელი ევროკავშირში გაწევრიანების თარიღად ჩაიწეროს რუსეთთან მომავალ სამშვიდობო შეთანხმებაში. მისი თქმით, უკრაინა ტექნიკურად ამისთვის მზად იქნება.

ევროკავშირი უკრაინის გაწევრიანების პროცესს უკვე აჩქარებს. უკრაინამ მიიღო ინფორმაცია ექვსიდან სამი საკანონმდებლო "კლასტერის" შესახებ, რომლებიც წევრობისთვის აუცილებელია. POLITICO-ს ცნობით, 3 მარტს კვიპროსში უკრაინას დამატებით დეტალებს მიაწვდიან.
ევროკავშირი ხაზგასმით აცხადებს, რომ განსაკუთრებით დემოკრატიასთან, სასამართლო სისტემასა და პოლიტიკურ ინსტიტუტებთან დაკავშირებული რეფორმის მოთხოვნები არ შერბილდება.

POLITICO ასევე წერს, რომ განიხილება მოდელი, რომლის მიხედვითაც უკრაინა, მოლდოვა და ალბანეთი შეიძლება ევროკავშირში ჯერ შეზღუდული უფლებებით შევიდნენ, ხოლო სრულ უფლებები მოგვიანებით მიიღონ.

უკრაინა მუდმივ "მეორე კატეგორიის" სტატუსს არ თანხმდება, მაგრამ მზადაა დროებითი შუალედური მოდელისთვის, თუ სრული წევრობა გარანტირებული იქნება. გერმანია ამ მოდელს ეწინააღმდეგება, თუმცა საფრანგეთი, იტალია და პოლონეთი მხარს უჭერენ.

POLITICO-ს ცნობით, ევროკავშირის გაფართოებას ყველა წევრი ქვეყნის თანხმობა სჭირდება, ხოლო უნგრეთის პრემიერმინისტრი ვიქტორ ორბანი უკრაინის გაწევრიანებას კატეგორიულად ეწინააღმდეგება. ორბანმა უკრაინას "მტერი" უწოდა, ზელენსკიმ კი უნგრეთი "პატარა მოსკოვად" მოიხსენია.

როგორც POLITICO წერს, თუ ორბანი ხელისუფლებაში დარჩება, ევროკავშირი იმედოვნებს, რომ დონალდ ტრამპი მასზე ზეწოლას მოახდენს. უკრაინის სამშვიდობო გეგმა 2027 წელს ევროკავშირში გაერთიანებას მოიცავს, ხოლო აშშ ვალდებული იქნება, რომ ეს არცერთმა მხარემ დაბლოკოს.

თუ ყველა სხვა გზა ჩაიშლება, POLITICO-ს განმარტებით, ევროკავშირმა შეიძლება მეშვიდე მუხლი გამოიყენოს რაც ნიშნავს იმას, რომ უნგრეთს ხმის უფლება ჩამოერთმევა და იგი ვეღარ დაბლოკავს უკრაინის გაწევრიანებას. ეს ნაბიჯი არჩევნებამდე არ გადაიდგმება, მაგრამ, როგორც POLITICO იუწყება, მზადდება ორბანის შესაძლო გამარჯვების შემთხვევაში.