ჩინეთში, წელს მთვარის ახალი წლის ერთ-ერთ ყველაზე მოულოდნელ თილისმად დრაკო მალფოი გამოჩნდა.

ტომ ფელტონი ყველაზე მეტად ჰარი პოტერის სერიაში შესრულებული როლით არის ცნობილი, თუმცა ახლა მსახიობი ჩინეთის ზოგიერთ ოჯახსაც "სტუმრობს": ონლაინ-შოპინგის პლატფორმებზე იყიდება სადღესასწაულო დეკორაციები, რომლებზეც მის სახეს ვხედავთ.

მისი მოულოდნელი პოპულარობა ჩინურ თარგმანს უკავშირდება: მალფოის სახელი ჩინურად ითარგმნება როგორც მა-ერ-ფუ, რაც შეიცავს სიტყვებს "ცხენი" და "იღბალი". ეს კი განსაკუთრებით იღბლიანად ითვლება მოახლოებული ცხენის წლისთვის.

ჰარი პოტერი ჩინეთში უკიდურესად პოპულარულია და აქ წიგნების ასობით მილიონი ეგზემპლარია გაყიდული. სერიის პირველი ფილმის ხელახალმა გამოსვლამ 2020 წელს, სამ დღეში 90 მილიონ იუანზე მეტი (დაახლოებით 13.6 მილიონი დოლარი) შემოსავალი მოიტანა.

მთვარის ახალი წლის წინ ჩინურ ოჯახებში ტრადიციულად კარებზე აკრავენ წყვილ წარწერებს: კეთილდღეობისა და ჯანმრთელობის მომასწავებელ ტექსტებს. ზოგი კი სახლს ამკობენ ფუძით, წითელი კვადრატული ქაღალდებით, რომლებზეც ჩინურად სიტყვა კეთილდღეობა ან ბარაქა წერია.

ფუძი ხშირად თავდაყირა აკიდია: ეს სიმბოლურად ნიშნავს, რომ იღბალი სახლში "მოდის", რადგან ჩინურ ენაში სიტყვა "თავდაყირა" და სიტყვა "მოსვლა" ერთნაირად ჟღერს.

ჩინურ სოციალურ ქსელებში გავრცელდა ფოტოები, სადაც მომხმარებლები კარებზე აკრავენ წყვილ წარწერებს ან თავდაყირა ჩამოკიდებულ მალფოის ცნობილ ირონიულ ღიმილს.

ონლაინ-ვაჭრობის პლატფორმებზიც სწრაფად აჰყვნენ ტენდენციას და გაყიდვაში გამოუშვეს სტიკერები და მაგნიტები ჰარი პოტერის პერსონაჟით.

ფოტო: BBC / taobao

მალფოის თემატიკაზე შექმნილმა ახალი წლის დეკორაციამ თავად ტომ ფელტონის ყურადღებაც მიიქცია, მან ინსტაგრამზე გააზიარა სთორი, სადაც მისი პერსონაჟი "ჩინური ახალი წლის სიმბოლოდ" არის მოხსენიებული.

მისმა რეაქციამ ჩინურ სოციალურ ქსელებში კიდევ უფრო დიდი აღფრთოვანება გამოიწვია; ფანები მას აქებდნენ ჰეშთეგით, "თავად მალფოი 100%-ით სასაცილოა".

ჯადოსნური ფრენჩაიზი ჩინეთში უზარმაზარი რაოდენობის ერთგული ფანებით სარგებლობს, ხოლო Warner Bros. Discovery-მ განაცხადა, რომ 2027 წელს შანხაიში ჰარი პოტერის სამყაროს ყველაზე დიდი Making Of Harry Potter Studio Tour გაიხსნება.