როცა უცხო ქვეყანაში მოგზაურობ და ადგილობრივ კულტურას მაინცდამაინც კარგად არ იცნობ, შეიძლება იფიქრო, რომ სახელდახელოდ მოწყობილი ღია კარვის ქვეშ გაშლილი სუფრა რა უნდა იყოს, თუ არა რესტორანი. ვისაც საქართველოში ზუსტად ასე გამართული ლხინის თუ ჭირის სუფრები გვახსოვს, მსგავს შეცდომას ალბათ არ დავუშვებდით, მაგრამ ტაილანდში ჩასული ტურისტებისთვის ეს ტრადიცია ნამდვილად უცნობი ყოფილა.

სოციალურ ქსელში რამდენიმე დღის წინ ვირუსულად გავრცელდა ვიდეო, როგორ ზის ტაილანდურ ქელეხში ორი ტურისტი, რომლებთანაც ჭირისუფალს წყალი მიაქვს. უცხოელები შემოგვიერთდნენ, სასადილო ეგონათო, წერს პოსტის ავტორი, რომელსაც ვიდეოში ეცინება კიდეც.

ადგილობრივი მედიის ცნობით, დაუპატიჟებელი სტუმრებისთვის თავდაპირველად არაფერი უთქვამთ, ჩვეულებრივად გაუმასპინძლდნენ კერძებით. თუმცა, მოგვიანებით აუხსნეს, რომ ისინი შემთხვევით სამგლოვიარო სუფრას შეუერთდნენ. ტურისტებს გაუგებრობისთვის მოუბოდიშებიათ და გამასპინძლებისთვის მადლობაც უთქვამთ.

ეს ამბავი ამდენად უჩვეულოც არ იქნებოდა, რომ არ გამეორებულიყო, თანაც — იმავე ოჯახში. ტაილანდური ტრადიციით, პანაშვიდზე მოსული სტუმრებისთვის ყოველთვის იშლება სუფრა და ამ შემთხვევიდან რამდენიმე დღის შემდეგ, გაშლილი კარავი ისევ რესტორანი ჰგონებიათ — ამჯერად, ნიდერლანდელ ტურისტებს. მათ თამამად შეუკვეთიათ კოქტეილები, სიტუაციის ახსნის შემდეგ კი, დაბნეულ სტუმრებს ჭირისუფლები ისევ გაუმასპინძლდნენ ტრადიციული ტაილანდური კერძებით და თან გააფრთხილეს, რომ საჭმელი ოდნავ ცხარე იყო.

საქართველოს მსგავსად, ქელეხის სუფრის გაშლა ტაილანდისთვისაც ძირძველი ტრადიციაა. მიიჩნევა, რომ ეს გარდაცვლილის ხსოვნის პატივსაცემად იმართება და, ამავდროულად, მადლიერების გამოხატვაა სტუმრებისადმი, რომლებმაც ოჯახი მოსვლით დააფასეს.