ბრიტანელი დეპუტატი მარკ პრიტჩარდი დაინტერესდა — გამოიძიებს თუ არა ბრიტანეთის საგარეო საქმეთა მინისტრი იმ ფაქტს, რომ, შესაძლოა, ირანი საქართველოს რეჟიმის დასაფინანსებლად იყენებდეს.

დეპუტატმა თავის კითხვაზე ყურადღება გაამახვილა საქართველოში დარეგისტრირებულ 13 000 ირანულ კომპანიაზე, რომელთაგან 700 ერთ მისამართზეა გაფორმებული.

"საბედნიეროდ, ირანის გავლენა სამხრეთ კავკასიასა და ცენტრალურ აზიაში კლებულობს, თუმცა ერთი ქვეყანა, სადაც, როგორც ჩანს, ის იზრდება, ეს ქვეყენა საქართველოა. იზიარებს თუ არა მინისტრი ჩემს შეშფოთებას იმ ბრალდებებთან დაკავშირებით, რომ საქართველოში დაახლოებით 13 000 ირანული კომპანიაა დარეგისტრირებული, რომელთაგან 700 ერთი პატარა შენობის მისამართზეა რეგისტრირებული ერთ პატარა სოფელში? არსებობს სანქციების თავიდან არიდებისა და მათი გვერდის ავლის რეალური საფრთხე. ეს ფული მიედინება ირანის რეჟიმთან და აფინანსებს მის მავნე და დამაზიანებელ საქმიანობას მთელ მსოფლიოში. მიიტანს თუ არა მინისტრი ამ საკითხს საგარეო საქმეთა მდივანთან და გამოიძიებს თუ არა, იყენებს თუ არა ირანი საქართველოს, როგორც "უკანა კარს" შავ ზღვაზე გასასვლელად და თავისი რეჟიმის დასაფინანსებლად?"— აღნიშნა მარკ პრიტჩარდმა.

კითხვაზე პასუხისას ახლო აღმოსავლეთისა და ჩრდილოეთ აფრიკის საკითხების მინისტრმა ჰამიშ ფალკონერმა აღნიშნა, რომ ირანის გავლენა, როგორც წესი, მავნე ხასიათისაა და ყველა მოკავშირე გააფრთხილა ირანთან ურთიერთობაში ფრთხილად იყვნენ.

"...ირანის გავლენა მის მეზობელ ქვეყნებსა და მის ფარგლებს გარეთ, როგორც წესი, მავნე ხასიათისაა. ჩვენ ვხედავთ ირანის გავლენის ხანგრძლივ კვალს ლიბანში, ღაზაში და მრავალ სხვა კონტექსტში, ამიტომ მე ყველა ჩვენს მოკავშირეს ვაფრთხილებ, რომ ირანთან ურთიერთობებში ძალიან ფრთხილები იყვნენ", — განაცხადა მინისტრმა.