აშშ-ის პრეზიდენტმა, დონალდ ტრამპმა განაცხადა, რომ ინდოეთიდან შემოტანილ საქონელზე ტარიფების 25%-დან 18%-მდე შემცირებას, მას შემდეგ გეგმავს, რაც ინდოეთის პრემიერმინისტრი ნარენდრა მოდი რუსეთის ნავთობის შეძენის შეწყვეტას დასთანხმდა. ინფრომაციას NBC ავრცელებს.

ეს ნაბიჯი ტრამპის მიერ რამდენიმე თვიან ზეწოლას მოჰყვა. ინდოეთმა რუსეთის მიერ შეთავაზებული შემცირებული ფასებით ისარგებლა იმ პერიოდში, როცა მსოფლიოს დიდი ნაწილი, ურკაინაში დაწყებული სრულმასშტაბიანი ომის ფონზე, მოსკოვის იზოლაციას ცდილობდა.

ტრამპის თქმით, ინდოეთი ასევე დაიწყებს ამერიკულ საქონელზე იმპორტის გადასახადების ნულამდე შემცირებას და 500 მილიარდი დოლარის ღირებულების ამერიკულ პროდუქციას შეიძენს.

"ეს უკრაინაში მიმდინარე ომის დასრულებას დაეხმარება, რომელიც ახლა მიმდინარეობს და სადაც ყოველ კვირას ათასობით ადამიანი იღუპება!“ — დაწერა ტრამპმა Truth Social-ზე ინდოეთზე ტარიფების შემცირების გამოცხადებისას.

ამის საპასუხოდ მოდიმ X-ზე დაწერა, რომ "მოხარულია" ტარიფების შემცირებით. ამას გარდა, მისი თქმით, ტრამპის "ლიდერობა სასიცოცხლოდ მნიშვნელოვანია გლობალური მშვიდობის, სტაბილურობისა და კეთილდღეობისთვის".

"მოუთმენლად ველოდები მასთან მჭიდრო თანამშრომლობას, რათა ჩვენი პარტნიორობა უპრეცედენტო სიმაღლეებზე ავიყვანოთ", — დაწერა მოდიმ.

შეგახსენებთ, ივნისში ტრამპმა გამოაცხადა, რომ აშშ ინდოეთიდან შემოტანილ საქონელზე 25%-იან ტარიფს დააწესებდა, რადგან მისმა ადმინისტრაციამ მიიჩნია, რომ ქვეყანამ საკმარისი არ გააკეთა აშშ-ის მიმართ სავაჭრო დეფიციტის შესამცირებლად და თავისი ბაზრების ამერიკული საქონლისთვის გასახსნელად. აგვისტოში ტრამპმა ინდურ პროდუქციაზე დამატებით 25%-იანი იმპორტის გადასახადები დააწესა რუსეთის ნავთობის შეძენის გამო, რის შედეგადაც ტარიფებმა ჯამურად 50%-ს მიაღწია.