"საერთაშორისო კრიტიკის, პასუხად შემიძლია ის განვაცხადო, რომ როგორც ჩანს, ეს არის სწორედ ის ხალხი, რომლებიც ემსახურებიან იმ გლობალურ ძალებს, რომლებსაც სურთ უკანონო ფულის გადმორიცხვა საქართველოში უკანონო საქმიანობების დასაფინანსებლად" — ამის შესახებ "ხალხის ძალის" დეპუტატმა, ეკა სეფაშვილმა "გრანტების შესახებ კანონში" დაგეგმილ ცვლილებებთან დაკავშირებით ჟურნალისტებთან საუბრისას განაცხადა. მისი თქმით, ცვლილებები "ჩვეულებრივი გრანტებისა და ჩვეულებრივი საქმიანობისთვის" რეპრესიებს არ ითვალისწინებს.

"საერთაშორისო კრიტიკის, პასუხად შემიძლია ის განვაცხადო, რომ როგორც ჩანს, ეს არის სწორედ ის ხალხი, რომლებიც ემსახურებიან იმ გლობალურ ძალებს, რომლებსაც სურთ უკანონო ფულის გადმორიცხვა საქართველოში უკანონო საქმიანობების დასაფინანსებლად. იმიტომ, რომ არავითარ რეპრესიებს ჩვეულებრივი გრანტებისა და ჩვეულებრივი საქმიანობისთვის ეს არ ითვალისწინებს. ისინი აჟღერებენ სწორედ იმ დაკვეთას და იმ მიზნისთვის იღვწიან, რომ მოახერხონ საქართველოში არალეგიტიმური ფულის შემოსვლა არალეგიტიმური საქმიანობისთვის", — განაცხადა ეკა სეფაშვილმა.

შეგახსენებთ, "გრანტების შესახებ" კანონში ცვლილებების თანახმად, ზუსტდება გრანტების განმარტება და განისაზღვრება, რომ გრანტად მიიჩნევა აგრეთვე სხვა სახელმწიფოს მოქალაქის ან სხვა სახელმწიფოს იურიდიული პირის მიერ საქართველოს მოქალაქისთვის ან საქართველოში ბინადრობის უფლების მქონე პირისათვის, ასევე იმ იურიდიული პირისათვის, რომლის საქმიანობა არსებითად საქართველოსთან დაკავშირებულ საკითხებზე აქტივობას მოიცავს, ფულადი ან ნატურალური ფორმით გადაცემული სახსრები, რომელიც ხმარდება, ან შეიძლება მოხმარდეს საქართველოს ხელისუფლებაზე, სახელმწიფო დაწესებულებებზე, ან საზოგადოების ნებისმიერ ნაწილზე რაიმე გავლენის მოხდენის რწმენით, ან განზრახვით განხორციელებულ, ან განსახორციელებელ ისეთ საქმიანობას, რომელიც მიმართულია საქართველოს საშინაო, ან საგარეო პოლიტიკის ჩამოყალიბებისკენ, გატარებისკენ, ან შეცვლისკენ, აგრეთვე, ხმარდება, ან შეიძლება მოხმარდეს ისეთ საქმიანობას, რომელიც უცხო ქვეყნის ხელისუფლების ან უცხოური პოლიტიკური პარტიის პოლიტიკური, ან საჯარო ინტერესებიდან, მიდგომებიდან, ან ურთიერთობებიდან გამომდინარეობს. ასეთი გრანტის მიღება პირს მხოლოდ საქართველოს მთავრობის წინასწარი ნებართვით შეეძლება.