ოცნების ხელისუფლების შს მინისტრის მოადგილე ალექსანდრე დარახველიძე ეხმაურება თბილისის მერის, კახა კალაძის მოწოდებას იმის შესახებ, რომ ოცნების პარლამენტს ვანდალიზმთან დაკავშირებით კანონის გამკაცრების მოთხოვნით მიმართავს.

დარახველიძე აცხადებს, რომ "თუ ადგილი ექნება ისეთი ტიპის ქონების დაზიანებას, რაც აღემატება 150 ლარს, ეს სისხლის სამართლის დანაშაულია და ითვალისწინებს პატიმრობას".

"საქართველოს შინაგან საქმეთა სამინისტრო თბილისის მერიასთან ერთად მნიშვნელოვნად გაამკაცრებს მიდგომას ქალაქის იერსახის დამახინჯებისა და ვანდალიზმის თითოეულ ფაქტთან მიმართებაში. სახელმწიფოს წინა პერიოდში ჰქონდა ერთგვარი ლოიალური მიდგომა მსგავსი ტიპის ქმედებებთან მიმართებაში, რამაც სახელმწიფოსთვის და კერძო მესაკუთრეებისთვის მილიონობით ლარის ზიანი გამოიწვია. შესაბამისად, მომდევნო პერიოდში გამკაცრდება ადმინისტრირება და აღსრულება თითოეული იმ სამართლებრივი ნორმის, რომელიც ითვალთვალება დასჯადობას იერსახის დამახინჯებისთვის, ასევე, ვანდალიზმისთვის. ხოლო იმ შემთხვევაში, თუკი ადგილი ექნება ისეთი ტიპის ქონების დაზიანებას, რაც აღემატება 150 ლარს, ეს წარმოადგენს სისხლის სამართლის დანაშაულს და ითვალისწინებს პატიმრობას. შესაბამისად, პოლიცია ყველა მსგავს ქმედებაზე დაიწყებს გამოძიებას და დანაშაულის ჩამდენი პირები მიეცემიან სისხლის სამართლებრივ პასუხისგებაში.

აქედან გამომდინარე, ყველა იმ პირს, ვინც ჩადის მსგავს ქმედებას მოვუწოდებთ, თავი შეიკავოს იერსახის დამახინჯებისგან, ვანდალიზმის ფაქტების ჩადენისგან. სხვა შემთხვევაში, სახელმწიფოს ექნება უმკაცრესი მიდგომა ასეთი ტიპის ქმედებების მიმართ," — განაცხადა დარახველიძემ. მის კომენტარს სამთავრობო ტელეკომპანია "რუსთავი 2" ავრცელებს.