ევროპარლამენტარები ევროკომისიას BBC-ის ჟურნალისტურ გამოძიებასთან დაკავშირებით მიმართავენ, რომლის თანახმადაც, საქართველოს ხელისუფლებამ საპროტესტო აქციის მონაწილეების წინააღმდეგ აკრძალული ქიმიური ნაერთი გამოიყენა. ევროკომისიისადმი ევროპარლამენტარების გასაგზავნი წერილს "ნეტგაზეთი" ავრცელებს. მათ წერილი დეპუტატმა მარკეტა გრეგოროვამ გაუზიარა.

"გამოძიებაში მოხმობილი ექსპერტების თანახმად, გამოყენებული ნივთიერება შესაძლოა იყოს "კამიტი", რაც სერიოზულ შეშფოთებას იწვევს ქიმიური იარაღის აკრძალვის კონვენციისა და ადამიანის უფლებათა საერთაშორისო სამართლის შესაძლო დარღვევებთან დაკავშირებით. დადასტურების შემთხვევაში, ეს იქნება პირველი მსოფლიო ომის შემდეგ ევროპაში მშვიდობიანი მოსახლეობის წინააღმდეგ მსგავსი ნივთიერების გამოყენების პირველი სავარაუდო შემთხვევა", — ნათქვამია ევროკომისიისადმი ევროპარლამენტარების გასაგზავნ წერილში.

ევროპარლამენტარებს აინტერესებთ:

  • როგორ აფასებს კომისია BBC-ის გამოძიების სანდოობასა და მასში გამოთქმულ ბრალდებებს;
  • რა დამატებითი ზომების მიღებას გეგმავს კომისია პასუხისმგებლობის უზრუნველსაყოფად და შემდგომი ესკალაციის თავიდან ასაცილებლად?
  • როგორ აფასებს კომისია შექმნილი ვითარების თავსებადობას საქართველოს ევროკავშირის კანდიდატის სტატუსთან და მიაჩნია თუ არა, რომ ახლა უფრო ქმედითი ნაბიჯების გადადგმაა საჭირო?

როგორც "ნეტგაზეთი" წერს, წერილზე ხელმომწერთა ზუსტი ვინაობა და რაოდენობა დაზუსტებული არ არის. "ტვ პირველის" ინფორმაციით, მას სხვადასხვა პოლიტიკური ჯგუფებიდან 20-მდე ევროპარლამენტარი უერთდება. ისინი ევროკომისიას ოფიციალურად მიმართავენ, შესაბამისად, კომისია ვალდებულია 6 კვირის განმავლობაში უპასუხოს.

შეგახსენებთ, რომ BBC-იმ 1-ელ დეკემბერს ჟურნალისტური გამოძიება გამოაქვეყნა, სადაც ნათქვამია, რომ ქართულმა ოცნებამ გასული წლის საპროტესტო აქციების დასაშლელად მოქალაქეების წინააღმდეგ პირველი მსოფლიო ომის ქიმიური იარაღი გამოიყენა".

2026 წლის 14 იანვარს პარტია ქართული ოცნება — დემოკრატიულმა საქართველომ ოფიციალური საჩივრით მიმართა BBC-ის საქართველოში პროტესტის მონაწილეების წინააღმდეგ, სავარაუდოდ, ქიმიური იარაღის გამოყენებასთან დაკავშირებული ფილმის საქმეზე.

როგორც 15 იანვარს გამართულ ბრიფინგზე ოცნების პარლამენტის თავმჯდომარემ, შალვა პაპუაშვილმა თქვა, ქართული ოცნება BBC-ს სთხოვს, აიღოს ფილმი და მასთან დაკავშირებული მასალების შესაბამისი პლატფორმებიდან და "საჯაროდ და მკაფიოდ" მოიხადონ ბოდიში.

16 იანვარს BBC-ის სპიკერმა "რადიო თავისუფლებას" განუცხადა, რომ "მიიღეს საჩივარი და მას დადგენილი პროცედურის შესაბამისად უპასუხებენ". BBC-ის გზავნილში ასევე ნათქვამია, რომ ჟურნალისტურ ნამუშევარს აქვს მათი მხარდაჭერა და მადლობას უხდიან მამაც ადამიანებს, რომლებმაც მონაწილეობა მიიღეს მასში.