მოსკოვის პროკურატურამ 30 წლის ალექსანდრე საქანიას 19 წლით თავისუფლების აღკვეთა მიუსაჯა. უწყების ცნობით, საქანაია პირველ 5 წელს მაქსიმალური უსაფრთხოების კოლონიაში მოიხდის.

გამომძიებლების თქმით, საქანია პირადად იცნობდა უკრაინის მხარეს მებრძოლი ორგანიზაცია "რუსეთის მოხალისეთა კორპუსის" (RVC) ლიდერს, დენის კაპუსტინს. სავარაუდოდ, საქანია ორგანიზაციას შეუერთდა და საქართველოში ყოფნისას ახალი წევრების მოძიება დაიწყო.
მოსკოვის პროკურატურა ალექსანდრე საქანიას უკანონო შეიარაღებულ დაჯგუფებასა და ტერორისტულ ორგანიზაციაში მონაწილეობას და ტერორისტულ საქმიანობაში დახმარებას ედავება.

"30 წლის ალექსანდრე საქანია დამნაშავედ ცნეს რუსეთის სისხლის სამართლის კოდექსის 208-ე მუხლის მე-2 ნაწილით (მონაწილეობა უკანონო შეიარაღებულ დაჯგუფებაში), რუსეთის სისხლის სამართლის კოდექსის 205.4 მუხლის მე-2 ნაწილით (მონაწილეობა ტერორისტულ ორგანიზაციაში), რუსეთის სისხლის სამართლის კოდექსის 205.5 მუხლის მე-2 ნაწილით (მონაწილეობა ტერორისტულ ორგანიზაციაში) და რუსეთის სისხლის სამართლის კოდექსის 205.1 მუხლის 1.1 ნაწილით (დახმარება ტერორისტულ საქმიანობაში).

დადასტურდა, რომ საქანიამ, 2022 წლის აგვისტოდან 2023 წლის დეკემბრამდე საქართველოში ყოფნისას, გამოიყენა პირადი კავშირები უკრაინის ტერორისტული ორგანიზაციის "რუსეთის მოხალისეთა კორპუსის" ლიდერთან, რომელიც ტერორისტულად არის მიჩნეული და აკრძალულია რუსეთის ფედერაციაში. ის შეუერთდა აღნიშნულ შეიარაღებულ დაჯგუფებას და მონაწილეობდა მის საქმიანობაში, ლიდერების მითითებით წევრობის კანდიდატების წარსულის შემოწმებით.

2023 წლის დეკემბრიდან 2024 წლის თებერვლამდე საკანია ხელმძღვანელობდა საქართველოში ფილტრაციის პუნქტს, სადაც დამოუკიდებლად იღებდა გადაწყვეტილებებს ორგანიზაციის საქმიანობაში მონაწილეობის მსურველი კანდიდატების შერჩევისა და დაქირავების შესახებ. ის ასევე ეძებდა და არწმუნებდა სხვებს, გაწევრიანებულიყვნენ და მონაწილეობა მიეღოთ "რუსეთის მოხალისეთა კორპუსში", ასევე აწყობდა შეხვედრებს, რომლებსაც ესწრებოდნენ აღნიშნული ტერორისტული ორგანიზაციის წარმომადგენლები მისი საქმიანობის გაგრძელების მიზნით", — წერია მოსკოვის პროკურატურის მიერ გავრცელებულ ინფორმაციაში.

"ეხო კავკაზას" ცნობით, საქანიას დაკავების შესახებ 2024 წლის აპრილში გახდა ცნობილი. მაშინ Telegram-ის არხმა Ostorogno Novosti-მ გაავრცელა ინფორმაცია, რომ ქართული წარმოშობის რუსეთის მოქალაქე, ალექსანდრე საქანია (ვიშნიაკოვი), რომელიც რუსეთში ჩავიდა, 27 მარტს დააკავეს. მათ ცნობით, თავდაპირველად ის ორჯერ ადმინისტრაციული ბრალდებით დააკავეს, შემდეგ კი — სისხლის სამართლის ბრალდებით.

საქანიას სახელი ადრეც ფიგურირებდა საქართველოს ემიგრანტულ საზოგადოებაში. მედიის ცნობით, ის ხელმძღვანელობდა მემარჯვენე პროქართულ Telegram-ის არხს Pax Iberica-ს, სადაც ის "სუფთა ქართული რასის" იდეას უწევდა პოპულარიზაციას და ასევე მონაწილეობდა ბათუმში Gigglz Bistro-ს ბარზე თავდასხმაში, რომელსაც ის "მემარცხენეთა თავშეყრის ადგილს" უწოდებდა. გარდა ამისა, საქანია-ვიშნიაკოვი დაკავშირებული იყო მოძრაობა "დაბრუნებასთან", რომელიც ეთნიკურ ქართველებს საქართველოს მოქალაქეობის მიღებაში ეხმარებოდა.