ვენესუელის პარლამენტის თავმჯდომარე ხორხე როდრიგესმა განაცხადა, რომ პატიმრების გათავისუფლების პროცესის ფარგლებში ციხიდან 400-ზე მეტი ადამიანი გამოუშვეს, თუმცა უფლებადამცველი ჯგუფები ამბობენ, რომ ბოლო დღეებში თავისუფლება მხოლოდ 60–70 პირმა მოიპოვა. ამის შესახებ ინფორმაციას Reuters ავრცელებს.

როდრიგესმა და აშშ-ის პრეზიდენტმა დონალდ ტრამპმა გასულ კვირას განაცხადეს, რომ აშშ-ის მიერ პრეზიდენტ ნიკოლას მადუროს დაკავების შემდეგ, მშვიდობის ჟესტის ნიშნად, ბევრი პატიმარი გათავისუფლდებოდა.

ოპოზიციის მიერ პოლიტიკურ პატიმრებად მიჩნეული ადამიანების გათავისუფლება მათი ერთ-ერთი მთავარი მოთხოვნაა. ვენესუელის ხელისუფლება ყოველთვის უარყოფდა, რომ ქვეყანაში ადამიანები პოლიტიკური ნიშნით იყვნენ დაკავებულები და აცხადებდა, რომ იმ 2 000 ადამიანიდან უმრავლესობა, რომლებიც 2024 წლის სადავო არჩევნების შემდეგ გამართულ პროტესტებზე დააკავეს, უკვე გაათავისუფლა.

"მივიღეთ გადაწყვეტილება, გარკვეული პატიმრების გათავისუფლების შესახებ — არა პოლიტიკური პატიმრების, არამედ ზოგიერთი პოლიტიკოსის, რომლებმაც დაარღვიეს კანონი და კონსტიტუცია," — განაცხადა როდრიგესმა პარლამენტის სხდომაზე და დასძინა, რომ ეს ნაბიჯი "მშვიდობიანი თანაცხოვრების" ხელშეწყობას ემსახურებოდა.

ამის პარალელურად, ადგილობრივმა არასამთავრობო ორგანიზაციებმა განაცხადეს, რომ ხუთშაბათიდან გათავისუფლებული პატიმრების რაოდენობა 60-დან 70-მდე მერყეობს.

ორშაბათს ვენესუელის სასჯელაღსრულების უწყებამ განაცხადა, რომ თავისუფლება 116-მა პირმა მოიპოვა.

Foro Penal-მა, წამყვანმა ადგილობრივმა არასამთავრობო ორგანიზაციამ, თქვა, რომ წლის დასაწყისში ციხეებში სულ მცირე 800 პოლიტიკური პატიმარი იმყოფებოდა.

Reuters-ის ცნობით, ოპოზიციის ლიდერი და ნობელის მშვიდობის პრემიის ლაურეატი მარია კორინა მაჩადო, რომელიც ხუთშაბათს ტრამპთან შეხვედრას გეგმავს, ერთ-ერთი მთავარი ფიგურაა პატიმრების გათავისუფლების საქმეში.

შეგახსენებთ, აშშ-ს პრეზიდენტმა დონალდ ტრამპმა 3 იანვარს განაცხადა, რომ ვენესუელის პრეზიდენტი ნიკოლას მადურო და მისი მეუღლე დააკავეს და ქვეყნიდან ვერტმფრენით აშშ-ში გადმოიყვანეს მას შემდეგ, რაც აშშ-მა კარაკასზე "მასშტაბური დარტყმები" განახორციელა.

ცნობისთვის, მადუროს ბრალად ედება კოკაინის ტრეფიკინგის ქსელის ხელმძღვანელობა, რომელიც ძალადობრივ ჯგუფებთან, მათ შორის მექსიკის სინალოას და ზეტას კარტელებთან, კოლუმბიის FARC-ის მეამბოხეებთან და ვენესუელის კრიმინალურ დაჯგუფება "ტრენ დე არაგუასთან" თანამშრომლობდა.

მას ოთხი სისხლის სამართლის ბრალდება აქვს წაყენებული: ნარკოტერორიზმი, კოკაინის იმპორტის მიზნით შეთქმულება, ასევე ავტომატური იარაღისა და დამანგრეველი მოწყობილობების ფლობა.

მადურო წლებია უარყოფს ამ ბრალდებებს და აცხადებს, რომ ისინი ვენესუელის მდიდარი ნავთობის რესურსების ხელში ჩაგდებისკენ მიმართული იმპერიალისტური გეგმების საფარია.