აშშ-ის პრეზიდენტმა, დონალდ ტრამპმა განაცხადა, რომ ნიკოლას მადუროს დაკავების შემდეგ შეერთებულმა შტატებმა შესაძლოა ვენესუელაზე მეორე სამხედრო დარტყმა განახორციელოს, თუ ადმინისტრაციის დარჩენილი წევრები აშშ-თან არ ითანამშრომლებენ — ამის შესახებ ინფორმაციას Reuters ავრცელებს.

ამავე კონტექსტში ტრამპმა კოლუმბიაზეც ისაუბრა და განაცხადა, რომ "ოპერაცია "კოლუმბია" მისთვის კარგად ჟღერს.

The Atlantic-ის ინფორმაციით, ტრამპმა ასევე დასძინა, რომ "თუ ვენესუელის პრეზიდენტის მოვალეობის შემსრულებელი დელსი როდრიგესი "სწორად არ მოიქცევა, ძალიან დიდ ფასს გადაიხდის, ალბათ, მადუროზე დიდსაც".

შეგახსენებთ, აშშ-ს პრეზიდენტმა დონალდ ტრამპმა 3 იანვარს განაცხადა, რომ ვენესუელის პრეზიდენტ ნიკოლას მადურო და მისი მეუღლე დააკავეს და ქვეყნიდან ვერტმფრენით გადმოიყვანეს მას შემდეგ, რაც აშშ-მ კარაკასზე "მასშტაბური დარტყმები" დაიწყო.

4 იანვარს, ვენესუელას უზენაესმა სასამართლომ ვენესუელის პრეზიდენტის მოვალეობის შემსრულებლად ვიცეპრეზიდენტი დელსი როდრიგესი დანიშნა. თავდაპირველად როდრიგესმა სიტყვით გამოსვლისას აშშ აგრესიულ პოლიტიკაში დაადანაშაულა და ნიკოლას მადუროს გათავისუფლება და დაბრუნება მოითხოვა.

მოგვიანებით როდრიგესმა სოციალურ ქსელში განაცხადა, რომ ის "ისწრაფვის იცხოვროს გარე საფრთხეების გარეშე" — The New York Times-ის შეფასებით, როდრიგესმა ბოლო განცხადებით "შეარბილა" დამოკიდებულება აშშ-თან.

"ჩვენ ვიწვევთ აშშ-ის მთავრობას, ითანამშრომლოს ჩვენთან საერთო განვითარებისკენ მიმართული თანამშრომლობის დღის წესრიგის ფარგლებში, საერთაშორისო სამართლის ჩარჩოში და გააძლიეროს საზოგადოებებს შორის მდგრადი თანაცხოვრება," — წერს როდრიგესი.