უკრაინის პრეზიდენტმა, ვოლოდიმირ ზელენსკიმ საახალწლო მიმართვისას განაცხადა, რომ სამშვიდობო შეთანხმება 90 პროცენტით მზად არის და დარჩენილი 10 პროცენტი "გადაწყვეტს უკრაინისა და ევროპის მომავალს".

"გუშინ, დილის 6 საათზე, კიევში დავბრუნდი. ჩვენი გუნდი გზაში თითქმის 50 საათი იმყოფებოდა. სამშვიდობო შეთანხმება 90 პროცენტით მზად არის. დარჩენილი 10 პროცენტი კი გაცილებით მეტია, ვიდრე უბრალოდ ციფრები. ამ ათ პროცენტში, ფაქტობრივად, ყველაფერია. ეს ის 10 პროცენტია, რომელიც გადაწყვეტს მშვიდობის ბედს, უკრაინისა და ევროპის მომავალს, იმას, როგორ იცხოვრებენ ადამიანები. ეს არის 10 პროცენტი მილიონობით სიცოცხლის გადასარჩენად. ეს არის 10 პროცენტი იმ მტკიცე ნებისყოფისა, რომელიც საჭიროა იმისთვის, რომ მშვიდობამ 100 პროცენტით იმუშაოს. ეს არის 10 პროცენტი იმ ერთიანობისა და სიბრძნისა, რომელიც სასოწარკვეთილად სჭირდება — უკრაინას, ამერიკას, ევროპას და მთელ მსოფლიოს. ათი პროცენტი მშვიდობამდე," — განაცხადა ზელენსკიმ.

ზელენსკიმ ასევე დასძინა, რომ უკრაინას ომის დასრულება სურს, მაგრამ "არა ნებისმიერ ფასად".

"რა სურს უკრაინას? მშვიდობა? დიახ. ნებისმიერ ფასად? არა. ჩვენ ომის დასრულება გვსურს, მაგრამ არა უკრაინის დასასრული. დაღლილები ვართ? ძალიან. ეს იმას ნიშნავს, რომ დანებებისთვის მზად ვართ? ისინი, ვინც ასე ფიქრობენ, ძალიან ცდებიან და ნათელია, რომ ამდენი წლის განმავლობაში ჯერ კიდევ ვერ გაიგეს, თუ ვინ არიან უკრაინელები. გვსურს თუ არა ომის დასრულება? აბსოლუტურად. რატომ არ მოხდა ეს? პასუხი ჩვენს მეზობლად არის. შეუძლია თუ არა რუსეთს ომის დასრულება? დიახ. სურს თუ არა მას ეს? არა. შეუძლია თუ არა მსოფლიოს, რომ მას ეს აიძულოს? დიახ და ეს ერთადერთი გზაა, რომელიც იმუშავებს," — განაცხადა უკრაინის პრეზიდენტმა, ვოლოდიმირ ზელენსკიმ საახალწლო მილოცვაში.