ყოფილი სახალხო დამცველი უჩა ნანუაშვილი აქტივისტ თამარა მეარაყიშვილის დაკავების საქმეს სოციალურ ქსელში ეხმაურება და საზოაგდობას ახალ დეტალებს აცნობს. მისი განცხადებით, აქტივისტის საქმე "იმდენად თეთრი ძაფითაა შეკერილი", რომ ოკუპირებული ცხინვალი "ხელმოსაჭიდს ეძებს" და დაკავებიდან მეორე დღეს მეარაყიშვილის და მისი მშობლების სახლის ჩხრეკა დაიწყეს.

ნანუაშვილი წერს, რომ "თავდაპირველად ე.წ. პროკურატურა თუ საუბრობდა სტრატეგიული ობიექტების გადაღებაზე და ჯაშუშობაზე, შემდეგ ეს რიტორიკა მედიასაშუალებებთან თანამშრომლობით და მასალების მიწოდებით შეიცვალა, ანუ ჟურნალისტური საქმიანობის გამოცხადება სურთ ჯაშუშობად".

"თამარ მეარაყიშვილისთვის ორთვიანი წინასწარი პატიმრობის მისჯის შემდეგ, გამომძიებლებმა მისი სახლი გაჩხრიკეს ახალგორში, საიდანაც წაიღეს სხვადასხვა პირადი ნივთი, მათ შორის თამარის გაგზავნილი წერილების ასლები ადგილობრივი დე-ფაქტო უწყებებისთვის ახალგორელების სხვადასხვა პრობლემებზე, კომპაქტ-დისკები საოჯახო ფოტოებით, ნიდერლანდების საელჩოს კონკურსში გამარჯვებისთვის 2018 წელს გადაცემული პრიზი "ადამიანის უფლებათა — ტიტა", ასევე ქართული ბანკების ვადაგასული ბარათები და სხვა. გამომძიებლებმა ასევე გაჩხრიკეს თამარის მშობლების სახლი ახალგორში, თუმცა იქიდან მალე წავიდნენ და მხოლოდ ზედაპირული ჩხრეკა ჩაატარეს.

როგორც ჩანს, იმდენად თეთრი ძაფითაა საქმე შეკერილი, ცდილობენ, რამე ხელმოსაჭიდის პოვნას და ამიტომ თამარის დაკავებიდან ორი დღის შემდეგ, დაიწყეს საცხოვრებელი სახლის ჩხრეკა.

თავდაპირველად ე.წ. პროკურატურა თუ საუბრობდა სტრატეგიული ობიექტების გადაღებაზე და ჯაშუშობაზე, შემდეგ ეს რიტორიკა შეიცვალა მედიასაშუალებებთან თანამშრომლობით და მასალების მიწოდებით. ანუ ჟურნალისტური საქმიანობის გამოცხადება სურთ ჯაშუშობად.

აღსანიშნავია, რომ თამარი წლების მანძილზე არამხოლოდ ადგილობრივ დე-ფაქტო ხელისუფლებას, ასევე არანაკლებ აკრიტიკებდა თბილისს მთელი რიგი დარღვევების გამო. თამარი კვლავ არ იღებს საკვებს, არ აღიარებს ბრალს და ითხოვს გათავისუფლებას. მისი ადვოკატი სამი დღის ვადაში გაასაჩივრებს წინასწარი პატიმრობის, აღკვეთის ღონისძიების შესახებ მიღებულ გადაწყვეტილებას. თუმცა გასაგებია, რომ "სასამართლოსგან" სამართლიან გადაწყვეტილებას ნაკლებად უნდა ველოდოთ.

ამ ფონზე, სრულიად გასაკვირი და მიუღებელია ის დუმილი და მხოლოდ ტექნიკური განცხადება, რაც ოფიციალური თბილისის მხრიდან კეთდება. დღემდე არ მოგვისმენია რას გეგმავს თბილისი თამარის გათავისუფლებისთვის. დღემდე არ ისმის მკაფიო ხმა მისი უფლებების დასაცავად!" — წერს ყოფილი სახალხო დამცველი უჩა ნანუაშვილი სოციალურ ქსელში.

ოკუპირებული ცხინვალის საქალაქო სასამართლომ სამოქალაქო აქტივისტ თამარა მეარაყიშვილს გუშინ, 24 დეკებერს ორთვიანი წინასწარი პატიმრობა შეუფარდა. მედიასაშუალება "საპას" ცნობით, ის გადაწყვეტილების გასაჩივრებას აპირებს. თამარ მეარაყიშვილი 22 დეკემბერს დააკავეს.

მანამდე მეარაყიშვილმა სოციალურ ქსელში განაცხადა, რომ შიმშილობას დაიწყებდა "ძალაუფლების თვითნებური გამოყენების, საჯარო სამსახურის შესახებ კანონის, შრომის კანონმდებლობისა და მისი უფლებების სრული უგულებელყოფის" წინააღმდეგ პროტესტის ნიშნად.

მეარაყიშვილმა ბოლო დღეების განმავლობაში რამდენჯერმე დაუკავშირდა ოკუპირებული სამხრეთ ოსეთის პარლამენტის თავმჯდომარეს, ალან მარგიევს, საკუთარი სოციალური ქსელის მეშვეობით და შეხვედრა ითხოვა. მან თქვა, რომ მოთხოვნა ე.წ. პარლამენტის მისაღებშიც შეიტანა, მაგრამ უშედეგოდ.

როგორც "კავკაზსკი უზელი" იტყობინება, ქართველი აქტივისტი თამარა მეარაყიშვილი ერთ წელზე მეტია ვერ იღებს ახალ პასპორტს, რაც მას ოკუპირებული სამხრეთ ოსეთის ფარგლებში გადაადგილებასა და დასაქმებაში ხელს უშლის. ის მიიჩნევს, რომ ხელისუფლების ქმედებები სოციალურ მედიაში მის კრიტიკულ პოსტებს უკავშირდება.

2024 წლის თებერვალში ჟურნალისტმა და აქტივისტმა თამარა მეარაყიშვილმა შიმშილობა გამოაცხადა. ის ლენინგორის რაიონული პროკურორის თანამდებობაზე დავით გურციევის დანიშვნას აპროტესტებდა, რომელმაც მის წინააღმდეგ ცილისწამების საქმეზე სისხლის სამართლის საქმედ აღძრა.