სოციალური სამართლიანობის ცენტრის ხელმძღვანელი თამთა მიქელაძე წერს, რომ ცხინვალის რეჟიმის მიერ შპიონაჟის ბრალდებით დაკავებული ქართველი აქტივისტი თამარ მეარაყიშვილი ადვოკატმა მოინახულა. მისივე თქმით, მეარაყიშვილი პროტესტის ნიშნად უარს ამბობს საკვების მიღებაზე.

მისი სასამართლო პროცესი დღეს უნდა გაიმართოს.

"ვიცი, რომ ბევრს გაინტერესებთ თამარ მეარაყიშვილის ამბავი.

თამართან დღეს იყო შესული ადვოკატი. ადვოკატის თქმით, თამარი ნორმალურად არის, მაგრამ უარს ამბობს საკვების მიღებაზე პროტესტის ნიშნად. იმედი მაქვს, რომ ამაზე თამარი უარს იტყვის შემდეგ დღეებში.

ხვალ იქნება აღკვეთის ღონისძიების გამოყენების თაობაზე სასამართლო სხდომა და ამ დროს ადვოკატი მოიპოვებს წვდომას მასალებზე და იმედი მაქვს, რომ უფრო მეტი გვეცოდინება მის საქმეზე.

ყველაფერი უნდა გავაკეთოთ, რომ თამარი გათავისუფლდეს.

ძალიან მნიშვნელოვანია ქართული მედიის აქტიურობა ამ საქმეზე და საერთაშორისო ინტერესის გაზრდა მის მხარდასაჭერად", — დაწერა თამთა მიქელაძემ გუშინ, 23 დეკემბერს სოციალურ ქსელში.

თამარ მეარაყიშვილი ოკუპირებულ ოკუპირებული ცხინვალის რეჟიმმა გუშინ დაიჭირა. მას შპიონაჟში ადანაშაულებენ.

"გამოძიების ვერსიით, საქართველოს მოქალაქე, რომელიც სამხრეთ ოსეთის ტერიტორიაზე იმყოფებოდა, ახორციელებდა ინფორმაციის შეგროვებასა და გადაცემას რესპუბლიკის სტრატეგიულად მნიშვნელოვანი ობიექტების შესახებ, რითაც საფრთხეს უქმნიდა ქვეყნის უსაფრთხოებას", — წერია ცხინვალის პროკურატურის მიერ გავრცელებულ განცხადებაში.