ქალმა პოლიტიკოსები 4 ოქტომბრის საქმეზე დაკავებული ევა შაშიაშვილისთვის აღკვეთის ღონისძიების სახით შეფარდებული პატიმრობის გირაოთი შეცვლას მოითხოვენ. ამ მიზნით მათ პროკურატურაში განცხადება შეიტანეს. ისინი გენერალურ პროკურორთან და მის მოადგილეებთან შეხვედრას მოითხოვენ.

ჩვენ როგორც ქალები, დედები და პოლიტიკოსები მოვითხოვთ ევა შაშიაშვილს აღმკვეთი ღონისძიების სახით შეფარდებული პატიმრობა შეეცვალოს გირაოთი. მოვითხოვთ გენერალურ პროკურორთან გიორგი გვარაკიძესთან და მის მოადგილეებთან შეხვედრას

"ჩვენ ქალი პოლიტიკოსები, ვდგავართ ერთად და მხარდაჭერას და სოლიდარობას ვუცხადებთ წინასწარ პატიმრობაში მყოფ ქალს, ევა შაშიაშვილს, ქვრივს, მარტოხელა დედას, რომელსაც ჰყავს შეზღუდული შესაძლებლობის მქონე შვილი. მას დედის გარდა სხვა მზრუნველი არ გააჩნია.

ჩვენ როგორც ქალები, დედები და პოლიტიკოსები, ვიაზრებთ დედა-შვილის მდგომარეობას და მოვითხოვთ ევა შაშიაშვილს აღმკვეთი ღონისძიების სახით შეფარდებული პატიმრობა შეეცვალოს გირაოთი.

ამიტომ მოვითხოვთ გენერალურ პროკურორთან გიორგი გვარაკიძესთან და მის მოადგილეებთან ზურაბ ბელთაძესთან, გიგა ძნელაძესთან, ავთანდილ კოჭლამაზაშვილთან და ამირან გულუაშვილთან შეხვედრას.

ჩვენ ვრჩებით დღეს 18 საათამდე პროკურატურაში და ველოდებით პასუხს.
აქვე მოვუწოდებთ ევას და მისი შვილის გულშემატკივრებს მოვიდნენ საქართველოს პროკურატურასთან ორთაჭალაში, (გორგასლის 24) და გამოხატონ სოლიდარობა და მხარდაჭერა, შეუერთდნენ ჩვენს მოთხოვნას.

თავისუფლება ევა შაშიაშვილს!", — წერია განცხადებაში.

ევა შაშიაშვილი 4 ოქტომბრის საქმეზე დააკავეს. მას პროკურატურა სსსკ-ს 2 მუხლით ჩადენილ დანაშაულებს ედავება: სტრატეგიული ან განსაკუთრებული მნიშვნელობის ობიექტის ხელში ჩაგდებას ან ბლოკირებას (სისხლის სამართლის კოდექსის 222-ე მუხლის მეორე ნაწილი) და ჯგუფური ძალადობის ორგანიზებას, ხელმძღვანელობას ან მასში მონაწილეობას (225-ე მუხლის მეორე ნაწილი).