აზერბაიჯანის პოლიციამ ქვეყნის ერთ-ერთ მთავარი ოპოზიციური პარტიის ლიდერის, ალი ქერიმლის სახლში, ილჰამ ალიევის წინააღმდეგ შესაძლო გადატრიალების მცდელობის ფართო გამოძიების ფარგლებში, ჩხრეკა ჩაატარა. ინფორმაციას Reuters ავრცელებს.

აზერბაიჯანული მთავრობის წყარომ Reuters-ს განუცხადა, რომ ქერიმლიზე ჩატარებული ჩხრეკა რამიზ მეჰდიევის წინააღმდეგ მიმდინარე სისხლის სამართლის საქმესთანაა დაკავშირებული — ის ყოფილ პრეზიდენტთან, ჰეიდარ ალიევთან დაახლოებული პირია. ჰეიდარ ალიევი აზერბაიჯანს 2003 წელს გარდაცვალებამდე მართავდა.

როგორც ქერიმლის მოადგილემ, სეიმურ ჰაზიმ Reuters-ს განუცხადა, ოპოზიციური აზერბაიჯანის სახალხო ფრონტის პარტიის (APFP) ორი წევრი — ფაიქ ამირლი და მამად იბრაჰიმი — შაბათს დააკავეს.

აზერბაიჯანის სახელმწიფო უსაფრთხოების სამსახურს ჩხრეკასთან დაკავშირებით კომენტარი არ გაუკეთებია.

მთავრობის წყაროს თქმით, ხელისუფლება მიიჩნევს, რომ ქერიმლის ფინანსურად მხარს მეჰდიევი უჭერდა. მეჰდიევი ჰეიდარ ალიევის მმართველობის პირველ წლებში, 1994 წელს, პრეზიდენტის ადმინისტრაციის უფროსად დაინიშნა.

ილჰამ ალიევმა, ჰეიდარ ალიევის შვილმა, 2019 წელს მეჰდიევი თანამდებობიდან გაათავისუფლა — ეს ნაბიჯი იმ დროისთვის ბევრის მიერ მამამისის ეპოქის მოხელეების გავლენის შესუსტების მცდელობად იქნა აღქმული.

გასულ თვეს ბაქოს სასამართლომ 87 წლის მეჰდიევი ოთხთვიან შინა პატიმრობაში დატოვა. მას ბრალადხელ ისუფლების ხელში ჩაგდების მცდელობა ედება.

APFP-ის ლიდერი ალი ქერიმლი, აზერბაიჯანში პროტესტების ორგანიზებასთან დაკავშირებით, არაერთხელ არის დაკავებული.