იაპონია, როგორც წესი, გარდა იმისა, რომ დანარჩენ მსოფლიოსთან შედარებით ტექნოლოგიურად წინ წასულია, ახალ ამბებში უცნაური და სხვა კულტურებისთვის გამაოგნებელი ნიუსებით ხვდება ხოლმე. თუმცა ყველამ კარგად ვიცით, რომ ეს ქვეყანა, ასევე გამაოცებელ ინოვაციებს გვთავაზობს და ამჯერად სწორედ ასეთი ამბავი გვაქვს.

იაპონელმა მეცნიერებმა ბრიტანელ მეცნიერებს აჯობეს და გენმოდიფიცირებულ ქათმებს ისეთი კვერცხები დაადებინეს, რომლებიც კიბოს საწინააღმდეგო ნივთიერებებს შეიცავს. ეს კი ამ დაავადების მკურნალობის ხარჯების შესამცირებლად გააკეთეს.

თუ მეცნიერები შეძლებენ და ინტერფერონ ბეტა ცილას, რომელიც ჰეპატიტისა და გაფანტული სკლეროზის საწინააღმდეგოდაც გამოიყენება, ქათმების საშუალებით წარმოქმნიან, მკურნალობის ფასი, რომელიც ამჟამად 100 ათასი იენია ($888), საგრძნობლად შემცირდება.

იაპონური გაზეთის, Yomiuri Shimbun-ის ცნობით, იაპონიის ინდუსტრიული მეცნიერებისა და ტექნოლოგიების ეროვნული ინსტიტუტის მეცნიერებმა ქათმის სპერმის პრეკურსორ უჯრედებში შეუშვეს გენები, რომლებიც ინტერფერონ ბეტას გამოიმუშავებენ.

ამ უჯრედებით მათ კვერცხები გაანაყოფიერეს, რის შედეგადაც გაჩნდნენ ქათმები, რომლებსაც ზემოაღნიშნული გენები მემკვიდრეობით გაჰყვათ, შესაბამისად, ისინი უკვე ისეთ კვერცხებს დებენ, რომლებიც ანტიკანცეროგენულ ნივთიერებას შეიცავს.

ამჟამად, იაპონელი მეცნიერების განკარგულებაში სამი გენმოდიფიცირებული ქათამია, რომლებიც კვერცხებს ყოველდღიურად დებენ.

იაპონელ მომხმარებელს კვერცხების მისაღებად დიდი ხანი მოუწევს მოცდა, რადგან ქვეყანაში უმკაცრესი რეგულაციები მოქმედებს. თავად მეცნიერები იმედოვნებენ, რომ პროდუქტი ბაზარზე მალე გამოვა და მედიკამენტების ფასები დღევანდელი ღირებულების 10%-ს გაუტოლდება.