კითხვაზე, "ყველაზე უკეთ, ვის შეუძლია დღეს დაეხმაროს საქართველოს?" - ეთნიკური უმცირესობების წარმომადგენელთა 54% პასუხობს, რომ ყველაზე უკეთ საქართველოს დახმარება რუსეთს შეუძლია.

CRRC საქართველოს მეირ ჩატარებული კვლევის თანახმად, ეთნიკური უმცირესობების წარმომადგენლები ქართულენოვნებთან შედარებით დაახლოებით 2-ჯერ იშვიათად ასახელებენ ევროკავშირს (15% და 35%) და დაახლოებით 4-ჯერ უფრო იშვიათად - ამერიკის შეერთებულ შტატებს (5% და 23%).

კვლევის ავტორები აღნიშნავენ, რომ წინა წლების ანალოგიურად, აღნიშნულ კითხვაზე ქართულენოვანი მოსახლეობისა და ეთნიკური უმცირესობების წარმომადგენლების პასუხები მნიშვნელოვნად განსხვავდება.

გამოკითხული მოსახლეობის 35 პროცენტი ევროკავშირს ასახელებს. ხოლო, მოსახლეობის დაახლოებით მეოთხედი რუსეთსა და ამერიკის შეერთებულ შტატებს (შესაბამისად, 24% და 23%).

კვლევის მიხედვით, საქართველოს მოსახლეობის მხოლოდ 2 პროცენტი აცხადებს, რომ საქართველოსთვის ევროკავშირის დახმარება საერთოდ არ არის მნიშვნელოვანი, ხოლო 8 პროცენტის აზრით, ეს დახმარება ნაკლებად მნიშვნელოვანია.

მოსახლეობის აბსოლუტური უმრავლესობის, 84 პროცენტის აზრით კი, ევროკავშირის მიერ საქართველოსთვის გაწეული დახმარება მნიშვნელოვანია, მათ შორის 38 პროცენტი ამ დახმარებას აფასებს, როგორც "ძალიან მნიშვნელოვანს".

ევროპის ფონდის დაკვეთით, CRRC-ის მიერ ჩატარებული გამოკითხვის საფუძველზე მომზადებულ ანგარიშში შეფასებულია ევროკავშირის მიმართ საზოგადოების ცოდნა და დამოკიდებულება. 2009, 2011, 2013, 2015 და 2017 წლების კვლევების შედეგების შედარების საფუძველზე, ანგარიშში ასევე შეფასებულია, თუ როგორ იცვლებოდა მოსახლეობის შეფასებები, მოლოდინები და იმედები ევროპასთან ინტეგრაციის კუთხით. 2017 წელს გამოიკითხა 2 258 რესპონდენტი ოთხ სტრატაში.