ევროკომისიამ, 13 ნოემბერს, უკრაინას, საგანგებო მაკროფინანსური დახმარების პროგრამიდან, 4.1 მილიარდი ევროს ოდენობის მეათე და საბოლოო ტრანში გამოუყო, რომელიც G7-ის მიერ მხარდაჭერილი ექსტრაორდინარული შემოსავლების აჩქარების (ERA) ინიციატივის ნაწილია. ამასთან ერთად, უკრაინა "უკრაინის ფონდიდან" მეხუთე რეგულარული გადახდა — 1.8 მილიარდ ევროზე მეტი მიიღო. ამის შესახებ ინფორმაციას ევროკომისია ავრცელებს.

საერთო ჯამში, დღევანდელი დაფინანსება 5.9 მილიარდ ევროს შეადგენს და კიდევ ერთხელ ადასტურებს, რომ ევროკავშირი უკრაინის ყველაზე ძლიერი და საიმედო პარტნიორია.

4.1 მილიარდი ევროს ამ ტრანშით ევროკომისიის წლევანდელი საგანგებო დახმარების პროგრამა, რომლის ფარგლებშიც უკრაინას მთლიანობაში 18.1 მილიარდი ევროს სესხი მიეწოდა, დასრულდა. G7-ის სხვა ქვეყნებმა უკვე გამოყვეს დამატებით 12.8 მილიარდი ევრო, რის შედეგადაც ERA-ს საერთო ოდენობა 30.9 მილიარდ ევრომდე გაიზარდა. როგორც G7-ის ქვეყნებიდან, ისე ევროკავშირიდან გამოყოფილი სესხები მომავალში დაფინანსდება ევროკავშირში გაყინული რუსეთის სუვერენული აქტივებიდან მიღებული შემოსავლებით — უკრაინის სესხების კოოპერაციის მექანიზმის საშუალებით.

ამასთან, "უკრაინის ფონდიდან" გამოყოფილი 1.8 მილიარდ ევროზე მეტი მხარდაჭერის მიზანი ქვეყნის მაკროეკონომიკური სტაბილურობის გამტკიცება, საჯარო მმართველობის გაუმჯობესება და იმ საკვანძო რეფორმების წინ წაწევაა, რომლებიც უკრაინის გეგმითაა განსაზღვრული. ეს ტრანში მას შემდეგ გაიცა, რაც უკრაინამ წარმატებით შეასრულა ცხრა რეფორმული ნაბიჯი მიმდინარე ეტაპისთვის და ერთი დარჩენილი პირობა წინა ეტაპიდან — რაც ევროკომისიამ შეაფასა და საბჭომ 4 ნოემბერს დაამტკიცა.

ბოლო გადარიცხვებით, უკრაინის მიმართ რუსეთის აგრესიული ომის დაწყებიდან, ევროკავშირის მხარდაჭერამ უკვე 187 მილიარდ ევროს გადააჭარბა.

ცნობისთვის, ტრანში საერთაშორისო საობლიგაციო სესხის სერია და ნაწილი, რომელიც გამოშვებულია ბაზრის კონიუნქტურის გაუმჯობესებისათვის ან სხვადასხვა ქვეყნის სასესხო ბაზრებზე სესხის განთავსებისათვის.