აშშ-ის სენატმა 60-40 ხმით მიიღო მთავრობის დაფინანსების კომპრომისული კანონპროექტი, რაც 40-დღიანი "შათდაუნის" შემდეგ მთავრობის ხელახლა გახსნისკენ გადადგმული პირველი ნაბიჯია.

პაკეტში გათვალისწინებულია მთავრობის დაფინანსება 2026 წლის 30 იანვრამდე და მთელი რიგი პროგრამები ფისკალური წლის განმავლობაში.

რვა დემოკრატი სენატორი დაეთანხმა შეთანხმებას, რომელიც მოიცავს შემდგომ ცალკეულ კენჭისყრას ჯანმრთელობის დაზღვევის საგადასახადო კრედიტების გახანგრძლივების შესახებ. შეთანხმება ასევე მოიცავს გარანტიებს შეჩერების დროს გათავისუფლებული სამთავრობო თანამშრომლების სამსახურში დაბრუნების შესახებ.

ეს კენჭისყრა აუცილებელი პროცედურების სერიიდან პირველია. მის დროს სენატმა გადალახა ე.წ. ფილიბასტერი (ქმედება, რომელიც მიზნად ისახავს დებატების გახანგრძლივებას და კანონპროექტზე, რეზოლუციაზე, შესწორებაზე ან სხვა საკამათო საკითხზე კენჭისყრის გადადებას ან თავიდან აცილებას). შემდგომი კენჭისყრებისთვის საკმარისი იქნება უმრავლესობა. შემდეგ კანონპროექტი უნდა დაამტკიცოს რესპუბლიკელთა უმრავლესობის წარმომადგენელთა პალატამ, შემდეგ კი ხელი მოაწეროს პრეზიდენტმა.

აშშ-ის მთავრობის შეჩერება 1-ელ ოქტომბერს დაიწყო მას შემდეგ, რაც რესპუბლიკელები და დემოკრატები ვერ შეთანხმდნენ ფედერალურ ბიუჯეტზე. დემოკრატები დაჟინებით მოითხოვდნენ ჯანმრთელობის დაზღვევის საგადასახადო კრედიტების გაფართოებას და სუბსიდირებული ჯანდაცვის პროგრამებისთვის თანხების გამოყოფას. რესპუბლიკელებმა უარი თქვეს ამ მოთხოვნების მხარდაჭერაზე.

ფედერალური მთავრობის ამჟამინდელი "შათდაუნი", რომელიც უკვე 40 დღეა გრძელდება, პირველი არ არის, მაგრამ ის ერთ-ერთი ყველაზე ხანგრძლივი და რეკორდულია ტრამპისთვის (ასეთი დახურვა მისი პირველი ვადის დროსაც მოხდა). "შათდაუნის" შედეგად დაიხურა სამთავრობო უწყებები, ასობით ათასი სამთავრობო თანამშრომელი შვებულებაში გავიდა, ქვეყნის მასშტაბით დაახლოებით 1500 რეისი გაუქმდა ან გადაიდო და პრობლემები შეიქმნა საკვების გადახდასთან დაკავშირებით.