"უკრაინა ჩვენ მეგობრულ ქართველ ხალხს მხოლოდ ერთ რამეს ვუსურვებთ: საბოლოოდ, გააცნობიერონ თავიანთი ევროპული მისწრაფებები — მიუხედავად მათი ამჟამინდელი მთავრობის პოლიტიკისა. საქართველო ევროპაა და არა "რუსული სამყარო", — უკრაინის საგარეო საქმეთა მინისტრი, ანდრეი სიბიგა ოცნების საგარეო საქმეთა მინისტრის განცხადებას ეხმაურება იმის შესახებ, რომ "უკრაინა ეწინააღმდეგებოდა საქართველოს ევროინტეგრაციას სხვადასხვა ფორმით".

მისივე თქმით, "საქართველოს EU-ში გაწევრიანების ცუდი შედეგების ყველა მიზეზი თბილისშია და არა კიევში".

"ქართული მხარე არ უნდა განაწყენდეს სარკეში საკუთარი ანარეკლის დანახვისას. საქართველოს ევროკავშირში გაწევრიანების ცუდი შედეგების ყველა მიზეზი თბილისშია და არა კიევში.

რაც შეეხება უკრაინას, ჩვენ მეგობრულ ქართველ ხალხს მხოლოდ ერთ რამეს ვუსურვებთ: საბოლოოდ, გააცნობიერონ თავიანთი ევროპული მისწრაფებები - მიუხედავად მათი ამჟამინდელი მთავრობის პოლიტიკისა.

საქართველო ევროპაა და არა "რუსული სამყარო", — წერს სიბიგა.

5 ნოემბერს ევროკავშირის გაფართოების ანგარიშზე საუბრისას, ოცნების საგარეო საქმეთა მინისტრმა, მაკა ბოჭორიშვილმა თქვა, რომ არაერთხელ გამოჩნდა, რომ უკრაინა "ეწინააღმდეგებოდნენ საქართველოს ევროინტეგრაციას სხვადასხვა ფორმით".

"ევროკავშირში საქართველოს ინტეგრაციის გზაზე და კანდიდატის სტატუსის მიღების პროცესს რაღაცნაირად თან სდევდა უკრაინის უარყოფითი დამოკიდებულება, რომ საქართველოს არ მიეღო კანდიდატის სტატუსი. ჩვენი თვალით ვნახეთ, თუ როგორი კამპანიები იმართებოდა 2022-2023 წლებში, ვიდრე ჩვენ მივიღებდით კანდიდატის სტატუსს და აქ არაერთხელ გამოჩნდა უკრაინის ჩართულობაც ამ მიმართულებით, რომ ისინი ეწინააღმდეგებოდნენ საქართველოს ევროინტეგრაციას სხვადასხვა ფორმით. ეს ხდებოდა, არ დამალულა, ყველამ ვიცით. უკრაინა არ არის დღეს ევროკავშირის წევრი და, შესაბამისად, ევროკავშირში ინტეგრაციის პროცესზე, რა თქმა უნდა, მას ვერ ექნება რამე დათქმები საქართველოსთან მიმართებით",— მაკა ბოჭორიშვილის კომენტარს "პირველი არხი" ავრცელებს.