ნარკოტიკების შემოტანის საქმეზე დაკავებული ბრიტანელი ბელა მეის საპროცესო შეთანხმება გაუფორმეს და სასამართლო დარბაზიდანვე გაათავისუფლეს — გადაწყვეტილება მოსამართლემ, გიორგი გელაშვილმა მიიღო.

პროკურატურის განცხადებით, ქალმა აღიარა დანაშაული, მაგრამ ბრალდების მხარემ გადაწყვეტილების მიღებისას მისი ასაკი და ფეხმძიმობა გაითვალისწინა. სასამართლომ ბელა მეის თავისუფლების აღკვეთა 5 თვისა და 24 დღის ვადით მიუსაჯა, მაგრამ, მან ეს პერიოდი წინასწარი დაკავებით მოიხადა. ბრიტანელი სტუდენტი ორსულობის 36-ე კვირაშია.

28 ოქტომბერს, ბელა მეის ოჯახმა 500 000 ლარიანი (187 000 დოლარი) გირაო გადაიხადა. ბრალის დამტკიცების შემთხვევაში, ბელა მეი კალის 15-დან 20 წლამდე ან უვადო პატიმრობა ემუქრებოდა.

ბელა მეი კალი საქართველოს საზღვარზე მას შემდეგ დააკავეს, რაც აეროპორტში მისი ბარგიდან ნარკოტიკული საშუალებები — 34 ფერმენტულად დახურული პაკეტი მარიხუანა (12 კგ.) და 20 პაკეტი ჰაშიში (2 კგ.) ამოიღეს.

დაკავებულის ოჯახის წევრების ინფორმაციით, ის სამოგზაუროდ ტაილანდში იმყოფებოდა და შვილის ძებნა მას შემდეგ დაიწყეს, რაც ბელა მათ ზარებს და შეტყობინებებს არ პასუხობდა. მოგვიანებით კი აღმოაჩინეს, რომ ბელა საქართველოს საზღვარზე დიდი ოდენობის ნარკოტიკების შემოტანის ბრალდებით დააკავეს.