კონგოში გაუჩინარებული ქართველი მფრინავის, სოსო ოსორაულის ოჯახის წევრებმა საქართველოს საგარეო საქმეთა სამინისტროსთან აქცია დაახლოებით ერთი საათის წინ გამართეს. ისინი აცხადებდნენ, რომ არ ენდობიან საგარეო საქმეთა სამინისტროდან მიღებულ ინფორმაციას მათი ოჯახის წევრის გარდაცვალებასთან დაკავშირებით და უწყება უმოქმედობაში დაადანაშაულეს.

ოსორაულის ოჯახის წევრები აცხადებენ, რომ ფოტოები, რომელიც მათ აჩვენეს ქართველი მფრინავის სიკვდილს არ ადასტურებს. აქციის მონაწილეები საგარეო საქმეთა სამინისტროსგან კონგოს რესპუბლიკასთან მოლაპარაკების გამართვისაკენ მოუწოდებენ.

"მე მოვითხოვე ფოტომასალის გადმოცემა, რაზეც უარი მითხრეს, რადგან ეს არის ოპერატიული მასალა და გადმოცემის უფლება არ გვაქვსო. იმ ფოტოზე, რომელზეც სოსოა გამოსახული, რომელითაც ამტკიცებენ, რომ არის დაღუპული თავში სროლის შედეგად. მაგრამ მას თავში ნასროლი არ ეტყობა. შესაბამისად, მიჩნდება ეჭვი, რომ ფოტო არის დამონტაჟებული. ამ ფოტოზე დაყრდნობა ჩემთვის შეუძლებელია", - განაცხადა სოსო ოსორაულის ძმამ.

დაახლოებით ცხრა თვის წინ, 23 მარტს, სოსო ოსორაული კონგოში კერძო კონტრაქტის საფუძველზე, ადგილობრივი ხელისუფლების სამხედრო ოპერაციაში მონაწილეობდა, მისი ვერტმფრენი ამბოხებულებმა ჩამოაგდეს, რის შემდეგაც ის ტყვედ ჩავარდა.

On.ge-ს სურდა საგარეო საქმეთა სამინისტროში გადაემოწმებინა ოსორაულთან დაკავშირებით, თუმცა ამ ეტაპზე უწყებაში სატელეფონო ზარს არ უპასუხეს. ივნისში კი აცხადებდნენ, რომ ბოლო ინფორმაციით, რომელიც მაისში მიიღეს სოსო ოსორაული შესაძლოა დაღუპული იყოს.