ქართულ ოცნებასთან დაახლოებული ბიზნესმენი, რესტორან "ქვევრის" მეპატრონე და მუსიკალური პროდიუსერი ლაშა ბასლანძე 40 წლის ასაკში გარდაიცვალა. ინფორმაციას სოციალურ ქსელში მისმა მეგობარმა, ამიკო ჯანელიძემ გაავრცელა.

"პრაიმ ტაიმი" წერს, რომ ლაშა ბასლანძის გარდაცვალების მიზეზი გულის შეტევა გახდა.

არსებული ინფორმაციით ლაშა ბასლანძე იტალიაში იმყოფებოდა და, იქიდან დაბრუნების შემდეგ, საქართველოში გარდაიცვალა. სოციალურ ქსელში მისი ბოლო აქტივობა 27 ოქტომბრის ღამეს იყო.

განახლება:

მოგვიანებით თბილისის მერმა, კახა კალაძემ სამძიმარი გამოუცხადა ლაშა ბასლანძის ოჯახს, ახლობლებსა და მეგობრებს და დაწერა, რომ ის "გამორჩეული მეგობარი, გულშემატკივარი, თანამებრძოლი და ერთგული ადამიანი იყო პირადად მისთვის და ქართული ოცნების დიდ ოჯახისთვის".

"ძნელია სამძიმრის სიტყვები დაწერო კაცზე, რომელიც გამორჩეული მეგობარი, გულშემატკივარი, თანამებრძოლი და ერთგული ადამიანი იყო პირადად ჩემთვის და ქართული ოცნების დიდ ოჯახისთვის.

ლაშა ბასლანძის სახით ქვეყანამ დაკარგა პატრიოტი კაცი, საზოგადოებამ კი სიმართლისთვის მებრძოლი, უკომპრომისო მოქალაქე.

სამძიმარს ვუცხადებ ლაშას ოჯახს, მის ახლობლებსა და მეგობრებს!", — დაწერა კალაძემ.