თბილისში, ბელიაშვილის ქუჩაზე მდებარე რესტორან "ქვევრში" გვიან ღამით, დაახლოებით 1 საათზე სროლა მოხდა.

"ტვ პირველის" ინფორმაციით, ქართულ ოცნებასთან დაახლოებული პირი ლაშა ბასლანძე, რესტორნის მფლობელს, ზურაბ ტიბუას თავს დაესხა და ცეცხლსასროლი იარაღიდან ბრმად გაისროლა.

შალვა ტიბუას ადვოკატმა, თამარ აბესაძემ IPN-ს განუცხადა, რომ შელაპარაკება ფინანსურ უთანხმოებაზე მოხდა. ადვოკატის ინფორმაციით, ტიბუას ბასლანძეზე "ქვევრი" იჯარით ჰქონდა გაცემული, რომლის ნაკისრ ვალდებულებებსაც ბრალდებული არ ასრულებდა. ბასლანძემ თავდასხმა მას შემდეგ გადაწყვიტა, რაც დაკისრებული ვალდებულებების შეუსრულებლობის გამო მფლობელმა მას ხელშეკრულება შეუწყვიტა.

"მესაკუთრე ტიბუასგან იჯარით იყო გადაცემული „ქვევრი“ ლაშა ბასლანძისთვის. ვინაიდან არ ხდებოდა ხელშეკრულებით გათვალისწინებული შეთანხმებული თანხის ანაზღაურება, ამასთან საბანკო ვალდებულებით იყო ნაყიდი აღნიშნული რესტორანი ტიბუას მიერ, ხელშეკრულება შეუწყვიტა ლაშა ბასლანძეს, დაატოვებინა ფართი, ვინაიდან არ ასრულებდა ნაკისრ ვალდებულებებს როგორც მეიჯარე. ამან გამოიწვია განაწყენება და მოახდინა თავდასხმა შუაგულ რესტორანში. დაცვის თანამშრომელს აქვს დაზიანება, თავად ტიბუას მსუბუქი ტვინის შერყევა აღენიშნება.

ლაშა ბასლანძემ წინასწარ დაურეკა ტიბუას, მივიდა რესტორანში. მას ხელშეკრულება არ ჰქონდა, ყველაფერი გაუქმებული ჰქონდა, პირდაპირ მიეჭრა რესტორანში, ის იყო შეიარაღებული. ახლა ამბობენ, რომ პნევმატური იარაღი იყოო. იარაღის დემონსტრირებით დაესხა თავს რესტორნის მესაკუთრეს. ატყდა ჩხუბი, იყო გასროლა. დაზიანდნენ ადამიანები. შალვა ტიბუა გამოიკითხა, ახლა ვიდეოკამერები უნდა წარვუდგინოთ, სადაც ჩანს რა მოხდა," — განაცხადა ადვოკატმა.

შინაგან საქმეთა სამინისტრომ მომხდარზე გამოძიება დაიწყო სისხლის სამართლის კოდექსის 236-ე მუხლით, რაც ცეცხლსასროლი იარაღის უკანონო ტარებას გულისხმობს.