სასამართლომ რესტორანი "ქვევრი" ქართულ ოცნებასთან დაახლოებული ბიზნესმენის, ლაშა ბასლანძის მმართველობის ქვეშ დააბრუნა.

"მივმართეთ სასამართლოს. სასამართლომ გადაწყვიტა, რომ მოიჯარე მხარე ჩვენ ვართ და ჩვენ უნდა შევიდეთ მმართველობაში. ამდენი ხანი ვცდილობდით შესვლას და არ გამოვიდა… სასამართლომ მიმართა აღსრულებას," — განუცხადა ბასლანძემ ტვ პირველს.

რესტორნის შენობას ბიზნესმენი შალვა ტიბუა ფლობდა და ბასლანძეზე იჯარით ჰქონდა გაცემული. ტიბუას ადვოკატის, თამარ აბესაძის განცხადებით ბასლანძე იჯარით ნაკისრ ვალდებულებებს ბრალდებული არ ასრულებდა, რის შემდეგაც ტიბუამ მას ფართის დატოვება მოსთხოვა. 7 სექტემბერს, ამ ფინანსური გაუგებრობის გამო ბასლანძე, სავარაუდოდ, ცეცხლსასროლი იარაღით შეიჭრა რესტორანში და შალვა ტიბუას თავს დაესხა.

ტიბუას ადვოკატმა, თამარ აბესაძემ ტვ პირველთან განაცხადა, რომ ის სასამართლო გადაწყვეტილებით "გაოცებულია", რადგან სასამართლომ იმ პირის ინტერესები დააკმაყოფილა, რომელიც საიჯარო ხელშეკრულების პირობებს არღვევდა.

რაც შეეხება 7 სექტემბრის თავდასხმას, ადვოკატის განცხადებით უწყებისგან ამ ფაქტს რეაგირება არ მოჰყვა და ბასლანძის ქმედება არ გამოიძიეს.

ცნობისთვის, 8 სექტემბერს ლაშა ბასლანძემ სოციალურ ქსელში კახა კალაძეს მადლობა გადაუხადა მხარდაჭერისთვის და დასძინა, რომ არასდროს იზამს ისეთ რამეს, რომ "ვინმეს პასუხი ვერ გასცენ".

აღსრულების ბიუროს რესტორანში შესვლიდან მალევე ლაშა ბასლანძემ სოციალურ ქსელში ვიდეო გამოაქვეყნა, სადაც ჩანს, როგორ აბრუნებს "ქვევრის" სარეკლამო ბანერზე წარწერას "პოლიციელი გმირია", რომელიც, სავარაუდოდ, შალვა ტიბუამ ჩამოხსნა.