შსს-ს მიერ გავრცელებული ცნობებით, 4 ოქტომბრის თვითმმართველობის არჩევნების შემდეგ 100-მდე აქტივისტი დააკავეს.

17 ოქტომბერს გამართულ ბრიფინგზე "ოცნების" ხელისუფლების შს მინისტრმა, გეკა გელაძემ განაცხადა, რომ 4 ოქტომბრის საქმეზე 62 ადამიანი დააკავეს.

21 ოქტომბერს თბილისის პოლიციის დეპარტამენტის დირექტორმა, ვაჟა სირაძემ ბრიფინგზე განაცხადა, რომ შეკრება-მანიფესტაციის ჩატარების წესის შესახებ განხორციელებული საკანონმდებლო ცვლილების შემდეგ, ბოლო 3 დღის განმავლობაში, შეკრება-მანიფესტაციის ჩატარების წესის დარღვევისთვის, ადმინისტრაციულ სამართალდარღვევისთვის გამოვლენილია კანონდარღვევის 53 ფაქტი, საიდანაც 42 პირია სამართალდამრღვევი.

დაკავებების სერია დღესაც გაგრძელდა. დილით საკუთარ სახლთან დააკავეს ჟურნალისტი ირაკლი წულაია. გზის გადაკეტვისთვის დაკავებული არიან "ფორმულას" ჟურნალისტები: ვახო სანაია, ქეთა ციცქიშვილი და ცირა ჟვანია, ასევე მწერალი ბექა ქურხული.

დღეს, 18:00 საათზე შსს-ში ბრიფინგი გაიმართა. სადაც ითქვა, რომ შსს-ს თანამშრომლებმა, ბოლო 24 საათის განმავლობაში, შეკრება-მანიფესტაციის ჩატარების წესის დარღვევისთვის, ადმინისტრაციულ სამართალდარღვევათა კოდექსის შესაბამისად, კიდევ 12 პირი დააკავეს.

შეკრება-მანიფესტაციის ჩატარების წესის შესახებ განხორციელებული საკანონმდებლო ცვლილების შემდეგ 4 დღეში — 18, 19, 20, 21 ოქტომბრის პერიოდში 28 პირი იყო დაკავებული. ჩვენს ხელთ არსებული ინფორმაციით, უკვე 40 პირია დაკავებული.