ჟურნალისტ ვახო სანაიას გზის გადაკეტვისთვის 6-დღიანი პატიმრობა მიუსაჯა. გადაწყვეტილება მოსამართლე მანუჩარ ცაცუამ გამოიტანა. სანაია დღეს, 19 ოქტომბერს დააკავეს.

სასამართლო სხდომაზე ვახო სანაიამ განაცხადა, რომ "არანაირი ხელოვნური გადაკეტვა არ ყოფილა, ეს იყო რეჟიმის წინააღმდეგ პროტესტის გამოხატვა".

"არანაირი ხელოვნური გადაკეტვა არ ყოფილა, ესაა რეჟიმის წინააღმდეგ პროტესტის გამოხატვა. ისინი [პოლიციელები] ეყრდნობიან რაღაცა კანონს, რასაც მე არ ვცნობ და ეს კანონია თავად უკანონო.

ეს არაა ხელოვნური გადაკეტვა, ესაა ყველაზე ბუნებრივი რამ, რაც კი ხდება რუსთაველზე დღეს," — თქვა ჟურნალისტმა ვახო სანაიამ სასამართლო პროცესზე (ტექსტს "ფორმულა” ავრცელებს).

შსს-ს ინფორმაციით, 18 ოქტომბერს მიმდინარე საპროტესტო აქციის ფარგლებში, ადმინისტრაციული სამართალდარღვევათა კოდექსის შესაბამისად 14 პირი დააკავეს, მათ შორის არიან ვახო სანაია და ლეიბორისტული პარტიის წევრი ლაშა ჩხარტიშვილი.

ოცნების ხელისუფლების შინაგან საქმეთა მინისტრის მოადგილის, ალექსანდრე დარახველიძის თქმით, 27 სამართალდამრღვევი პირია იდენტიფიცირებული, რომელთაგან 14 პირი უკვე დაკავებულია, ხოლო 13 პირის მიმართ ადმინისტრაციული საქმის წარმოება მიმდინარეობს და მომდევნო დღეებში მათი საქმეების სასამართლოში ადმინისტრაციული წესით განხილვა მოხდება.