ოცნების ხელისუფლების განათლების მინისტრმა, გივი მიქანაძემ ირაკლი კობახიძის მიერ წარდგენილ განათლების რეფორმაზე საუბრისას თქვა, რომ მათი "კონკრეტული მიზანია, რომ სახელმწიფო უნივერსიტეტებმა, იმუშაონ სახელმწიფო დაკვეთაზე".

"ეს რეფორმა ძირითადად ეხება სახელმწიფო უნივერსიტეტებს. დღეს საქართველოში მოქმედებს 64 უმაღლესი სასწავლებელი, რომელთაგანაც 19 არის სახელმწიფო და 45 არის კერძო უმაღლესი სასწავლებელი. ჩვენი კონკრეტული მიზანი არის, რომ სახელმწიფო უნივერსიტეტებმა, იმუშაონ სახელმწიფო დაკვეთაზე. რას ნიშნავს ეს? აქ საუბარი გვაქვს იმ პროფესიების აქტიურ ლობირებაზე, რომელზეც დეფიციტური მოცემულობა გვაქვს და მოთხოვნადი არის ბაზარზე.

როგორ შეიძლება ეს დაკვეთა მივიღოთ? ეს ჰაერიდან ვერ მოვა, რა თქმა უნდა. ამისთვის საჭირო არის, რომ განათლების, მეცნიერებისა და ახალგაზრდობის სამინისტრომ ეკონომიკის სამინისტროსთან და ბიზნესსექტორთან ერთად რეგულარულად აწარმოოს ბაზრის კვლევა იმისთვის, რომ ჩვენ პულსზე გვედოს ხელი იმისთვის, რომ ყოველწუთიერად ვიცოდეთ ბაზრის მოთხოვნილება რა არის. ბაზარი ჩვენ ვერ მოგვერგება. ჩვენ უნდა მოვერგოთ ბაზრის მოთხოვნილებას. ამიტომ უნდა მივყვეთ იმ მაჯისცემას, რომელიც ბაზრის მოთხოვნილებიდან არის", — განაცხადა გივი მიქანაძემ.

მან "პირველი არხის" ეთერში ისიც თქვა, რომ ახალი რეფორმის გათვალისწინებით, "არ ექნებათ საჭიროება, რომ კონკრეტულ სპეციალობებზე, კონკრეტულ პროფესიებზე შემოვიყვანოთ უცხოეთიდან ადამიანები", ამის ნაცვლად "ადგილობრივ მოსახლეობას დაასაქმებენ და მისცემენ ღირსეულ ანაზღაურებას".

"ჩვენ არ გვექნება საჭიროება, რომ კონკრეტულ სპეციალობებზე, კონკრეტულ პროფესიებზე შემოვიყვანოთ უცხოეთიდან ადამიანები, არამედ ჩვენ [გვინდა] ადგილობრივი მოსახლეობა დავასაქმოთ და მივცეთ ღირსეული ანაზღაურება", — თქვა მიქანაძემ.

მეტი განათლების რეფორმაზე: