"მედიის ადვოკატირების კოალიცია" ფორმულას ჟურნალისტების, ქეთა ციცქიშვილისა და ვახო სანაიას დაკავებას ეხმაურება. მათი თქმით, ეს ნაბიჯი "დამოუკიდებელ მედიაზე თავდასხმისა და ზეწოლის კიდევ ერთი შემთხვევაა." მედიის ადვოკატირების კოალიცია "ქეთა ციცქიშვილს, ვახო სანაიას და ყველა უკანონოდ დაკავებულ მოქალაქეს, რომლებიც რეპრესიული კანონმდებლობის მსხვერპლნი გახდნენ" სრულ სოლიდარობას უცხადებს და მათ დაუყოვნებლივ გათავისუფლებას მოითხოვს.

"ტელეკომპანია ფორმულას ჟურნალისტის ქეთა ციცქიშვილის დაკავება დამოუკიდებელ მედიაზე თავდასხმისა და ზეწოლის კიდევ ერთი შემთხვევაა.

მედიაში გავრცელებული ინფორმაციის თანახმად, ფორმულას ჟურნალისტი ქეთა ციცქიშვილი, სავარაუდოდ, გზის გადაკეტვის მოტივით დააკავეს.

აღსანიშნავია, 19 სექტემბერს უკანონოდ დააკავეს ფორმულას კიდევ ერთი ჟურნალისტი და ტელეწამყვანი ვახო სანაია, რომელსაც იგივე მოტივით 6-დღიანი პატიმრობა შეეფარდა.
ქართული ოცნების მიერ ჟურნალისტების დაკავება მედიისა და გამოხატვის თავისუფლებაზე პირდაპირი შეტევაა. ასეთ პირობებში, დამოუკიდებელი მედიის საქმიანობა სერიოზული საფრთხის წინაშე დგას, რაც დემოკრატიული საზოგადოების ინფორმირების უფლებას მნიშვნელოვნად ზღუდავს.

მედიის ადვოკატირების კოალიცია სრულ სოლიდარობას უცხადებს ქეთა ციცქიშვილს, ვახო სანაიას და ყველა უკანონოდ დაკავებულ მოქალაქეს, რომლებიც რეპრესიული კანონმდებლობის მსხვერპლნი გახდნენ. კოალიცია მოითხოვს მათ დაუყოვნებლივ გათავისუფლებას და ჟურნალისტების მიმართ მიზანმიმართული დევნის შეწყვეტას", — წერია განცხადებაში.