ლეიბორისტული პარტიის წევრი ლაშა ჩხარტიშვილი, რომელიც დღეს გზის გადაკეტვის ბრალდებით დააკავეს, ადმინისტრაციული დაკავებიდან გაათავისუფლეს. მისი სასამართლო პროცესი 24 ოქტომბრისთვის გადაიდო.

"დედის ორმოცზე შვილთან ერთად მის საფლავზე მიმავალი დამაკავეს... მთელი დღე, ხელბორკილებით გამატარებინეს, ხვალ ნებაყოფლობით გამოცხადების ხელწერილზეც უარი მითხრეს... და მხოლოდ თქვენი, საზოგადოების აღშფოთებისა და სოლიდარობის შემდეგ, ღამით, სასამართლოზე განაცხადეს, ახლა მიბრძანდით სასაფლაოზეო... ჰოდა, ბიძინას და მისი მონა-ჯალათების ორმოცზე მაინც, დროულად მივალ... დამხობა რეჟიმს!!! ბოლომდეე! დიდი მადლობა ყველას სოლიდარობისა და ბრძოლისთვის!", — წერს ლეიბორისტული პარტიის წევრი ლაშა ჩხარტიშვილი სოციალურ ქსელში.

ლაშა ჩხარტიშვილი დღეს დააკავეს. ვიდეოში, სადაც მისი, სავარაუდო, დაკავებაა ასახული, ის ამბობს, რომ დღეს მისი დედის ორმოცია და სასაფლაოზე მიდიოდა. მისივე თქმით, მან რუსთაველის გამზირზე გზა შეგნებულად გადაკეტა და ეს "პოლიტიკური აქტი" იყო.