"სპს-ს პენიტენციურ დაწესებულებებში ბრალდებულ/მსჯავრდებულთა რაოდენობის ზრდა არ შეესაბამება რეალობას", — ასე ეხმაურება სპს სახალხო დამცველის ყოფილი მოადგილის, გიორგი ბურჯანაძის მიერ გავრცელებულ ინფორმაციას სპს-ს დაწესებულებებში ბრალდებულ/მსჯავრდებულთა რაოდენობის ზრდასთან დაკავშირებით.

უწყება განმარტავს, რომ ციხეებში პატიმრების განთავსების მაქსიმალური ლიმიტი 12 332-ია, ამჟამად კი 10 445-ია განთავსებული.

"პენიტენციური დაწესებულებების შესახებ" ბრძანების შესაბამისად, სპეციალური პენიტენციური სამსახურის პენიტენციურ დაწესებულებებში ბრალდებულთა/მსჯავრდებულთა განთავსების მაქსიმალური ლიმიტი შეადგენს 12 332 ბრალდებულს/მსჯავრდებულს. 2025 წლის 13 ოქტომბრის მდგომარეობით, სპეციალური პენიტენციური სამსახურის პენიტენციურ დაწესებულებებში საერთო ჯამში განთავსებულია 10 528 ბრალდებული/მსჯავრდებული.

ბოლო 10 წლის განმავლობაში პენიტენციურ დაწესებულებებში განთავსებულ ბრალდებულ/მსჯავრდებულთა საშუალო რაოდენობა უმნიშვნელოდ იცვლებოდა, მაგალითად 2024 წლის სექტემბრის თვის მონაცემებით ბრალდებულ/მსჯავრდებულთა საერთო რაოდენობა შეადგენდა 10457-ს, ხოლო 2025 წლის ანალოგიური მონაცემებით კი 10445-ს.

ასევე, აღსანიშნავია რომ, რამდენიმე პენიტენციურ დაწესებულებაში შესაძლებელია ზემოაღნიშნული ბრძანებით განსაზღვრულ რაოდენობაზე მეტი ბრალდებულის/მსჯავრდებულის განთავსება მათი უფლებრივი მდგომარეობის გაუარესების გარეშე, კანონმდებლობით დადგენილი მოთხოვნების სრული დაცვით.

ბრძანებით განსაზღვრულ ოდენობას უმნიშვნელოდ აღემატება ორ პენიტენციურ დაწესებულებაში განთავსებულ პირთა რაოდენობა. 2025 წლის სექტემბრის თვეში მიმღები პენიტენციური დაწესებულებებიდან სხვადასხვა პენიტენციურ დაწესებულებაში ეტაპირებულ იქნა საერთო ჯამში 617 ბრალდებული/მსჯავრდებული, აქედან დახურული ტიპის დაწესებულებაში გადაყვანილ იქნა 137, ხოლო ნახევრად ღია ტიპის დაწესებულებაში 480.

სპეციალური პენიტენციური სამსახური კიდევ ერთხელ მოუწოდებს ნებისმიერ პირს, თავი შეიკავონ მსგავსი სახის ინფორმაციის გავრცელებისგან, რომელიც მიზნად ისახავს საზოგადოებისთვის არასწორი ინფორმაციის მიწოდებას და სპეციალური პენიტენციური სამსახურის საქმიანობის დისკრედიტაციას", — წერია გავრცელებულ განცხადებაში.

ამის საპასუხოდ გიორგი ბურჯანაძე წერს, რომ "საქსტატის 2025 წლის აგვისტოს ანგარიშში წერია რომ სამ ციხეში აქვთ გადამეტებული პატიმართა რაოდენობა და არც თუ ისე უმნიშვნელო რაოდენობით". მისივე თქმით, "ამ განცხადებით სპეციალურმა პენიტენციურმა სამსახურმა დაადასტურა, რომ ოქტომბერში (აგვისტოს შემდეგ) კიდევ გაზრდილა პატიმრების საერთო რაოდენობა 404 პატიმრით და დღეს ჯამურად 10 528 პატიმარი გვყოლია".

მანამდე გიორგი ბურჯანაძემ სოციალურ ქსელში დაწერა, რომ “2025 წელს, იანვრიდან აგვისტომდე 1532-ით არის გაზრდილი პატიმართა საერთო რაოდენობა საქართველოში.

"8 თვეში ციხის პოპულაცია 17%-ით გაიზარდა. 100-ით მეტი ქალი და 1432-ით მეტი კაცია ციხეში სხვადასხვა დანაშაულისთვის ბოლო 8 თვეში.

2015 წლის შემდეგ არ ყოფილა ამდენი პატიმარი ერთად ციხეში.

აგვისტოს მონაცემებით, გლდანის ციხეში დასაშვებ ლიმიტზე 432-ით მეტი პატიმარია.

ქსნის ე.წ. ზონაში დასაშვებ ლიმიტზე 251-ით მეტი პატიმარია,

ქუთაისის ციხეში დასაშვებ ლიმიტზე 111-ით მეტი პატიმარია", — წერს ბურჯანაძე.