თავდაცვის ყოფილი მინისტრი ბაჩო ახალია შსს-ში 4 ოქტომბრის საქმეზე მოწმის სახით გამოკითხვისა და ხმის ნიმუშის აღების მიზნით დაიბარეს. გამოკითხვაზე შესვლამდე ახალაიამ მედიასთან საუბრისას განაცხადა, რომ აუდიოჩანაწერი "1000 %-ით ფალსიფიცირებულია, არა თუ სიტყვა, ბგერაც არ არის" მისი. რაც შეეხება 4 ოქტომბრის მოვლენებს, მან მწუხარება გამოთქვა, რომ მოვლენებს "სამზარეულოდან ადევნებდა თვალს და არ იყო ჩართული პროცესებში".

"არც უთქვამთ რაზე დამიბარეს, 1 წუთის წინ გავიგე, რომ, თურმე, ხმის ნიმუში უნდა აიღონ, მანამდე მითხრეს, რომ 4 ოქტომბრის ძალადობის საქმეზე მიბარებდნენ. რაც შეეხება ხმის ნიმუშს — 1000 %-ით ფალსიფიცირებულია. არა თუ სიტყვა, ბგერაც არ არის ჩემი. ვისაც გაინტერესებთ, გეტყვით, რომ ბატონი პაატასთვის ამ სტილით და "პაატათი" მიმართვა არასდროს მიკადრებია. ჩემი უფროსი მეგობარია და ყოველთვის მოკრძალებული ვარ, საერთოდ სხვა სახის ურთიერთობა გვაქვს, ვიდრე იქ ჩანს. ძალიან მრცხვენია და ძალიან "მიტყდება", რომ არაფერში ვიყავი ჩართული. სამწუხაროდ, მრცხვენია, რომ ეს ხალხი ახლა ზის და მე სამზარეულოდან ვადევნებდი ამ ყველაფერს თვალს. სამწუხაროა," — განაცხადა თავდაცვის ყოფილმა მინისტრმა, ბაჩო ახალაიამ.

ახალაია 4 ოქტომბერთან დაკავშირებით განვითარებულ მოვლენებს "პრიმიტიულ პროპაგანდად" აფასებს. თქვა, რომ "დახარჯეს 13 წლის განმავლობაში რესურსი, რომ ჰყოლოდათ რამდენიმე "ბუა", მათ შორის, ერთი მე ვარ".

"მეორე მხრივ, ცოტა საღი აზრის ფარგლებში თუ აზროვნებენ ადამიანები, უნდა ესმოდეთ, რისი ორგანიზებაა მანდ, ბატონი პაატა ბურჭულაძის და ლევან ხაბეიშვილის მოწოდება სჭირდებოდა ვინმეს ორგანიზებისთვის? საკუთარი თვალით ვერ ხედავენ, სად ცხოვრობენ?

აქ საუბარია ერთ ძალიან მარტივ რამეზე. ჩემი აზრით, რეჟიმს უბრალოდ არ უნდა დაინახოს მარტივი ჭეშმარიტება, რომ საქართველოში არსებობენ პატრიოტი ადამიანები, ისეთები, როგორიც არიან ბატონი პაატა, მურთაზი, ლევან ხაბეიშვილი და სხვები, რომელთაც არ სჭირდებათ, იმისთვის რომ მშვიდობიანი სამოქალაქო აჯანყება მოაწყონ, ვინმეს კარნახი, რამე სახით ორგანიზება ან რამე. როგორც თქვენ ნახეთ, ისე ვხედავდი მეც.

მე მგონია, რომ პრიმიტიულ პროპაგანდასთან გვაქვს საქმე, დახარჯეს 13 წლის განმავლობაში რესურსი, რომ ჰყოლოდათ რამდენიმე "ბუა", მათ შორის ერთი მე ვარ.

ბატონ პაატას ვიცნობ ძალიან კარგად, უდიდესი პატივისცემა მაქვს მის მიმართ, ჩვენი ოჯახის ახლობელია. მურთაზი [ზოდელავა] ჩვენი მეზობელია.

მე მგონია, რომ უბრალოდ პრიმიტიული სცენარი გამოიყენეს. ცდილობენ ხაზი გაუსვან იმას, რომ მთელმა საქართველომ რაც დაინახა, გაგიჟებული პატრიოტების თავგანწირვა კი არ იყო, სინამდვილეში ქართველები კი არ ვარსებობთ, სინამდვილეში ჩვენ არ გვყავს 5 ან 15 ან 100 კაცი, რომელსაც შეუძლია თავგანწირვა, სინამდვილეში ვიღაცები ვიღაცებს უნდა აიძულებდნენ, რომ იყვნენ პატრიოტები. ესაა კიდევ ერთი დამცირების მცდელობა მაგ საოცარი ადამიანების და მათთან ერთად მთელი საქართველოს," — განაცხადა ახალაიამ.

თავდაცვის ყოფილი მინისტრი გამოკითხვაზე ადვოკატის გარეშე გამოცხადდა. მისი განმარტებით მიმდინარე სამართლებრივ პროცესებიდან გამომდინარე "კრიმინალი და სასამართლო აღარ არსებობს" და აზრი არ ჰქონდა მის მიერ სამართლებრივი ზომების მიღებას.

ახალაიამ ისიც თქვა, რომ რამდენიმე თვის წინ დაბრუნდა საქართველოში და ის მუდმივი ზედამხედველობის ქვეშ იმყოფება. "ტვ პირველი" ჟურნალისტის დასმულ კითხვაზე — აპირებდა, თუ არა ის ქვეყნის ხელმეორედ დატოვებას," ახალიამ განაცხადა — "კი, მაგრამ ეს არაა მთავარი… მე კი არა, ყველას შემოგითვალეს, ბიძინა ივანიშვილმა შემოგითვალათ, ან წახვალთ ციხეში, ან დატოვებთ ქვეყანას ან გარუსდებით".

4 ოქტომბერს სამთავრობო ტელეკომპანია "იმედმა" გაავრცელა აუდიოჩანაწერი, რომლის მიხედვითაც, თბილისში არეულობების დაგეგმვაზე, სავარაუდოდ, პაატა ბურჭულაძე და ბაჩო ახალაია საუბრობენ. ჩანაწერის ავთენტურობა დადასტურებული არ არის. როგორც ტელეკომპანია იტყობინება, აუდიოფაილი ელფოსტის საშუალებით მიიღეს.