ქუთაისის საოლქო კომისიის თავმჯდომარე ლარინა ლოლიაშვილის ინფორმაციით, 10:00 საათისთვის ადგილობრივი თვითმმართველობის არჩევნებში ხმა 10 241-მა ადამიანმა მისცა.

მისივე განცხადებით, შედარებისთვის, თვითმმართველობის წინა არჩევნების დროს ეს მაჩვენებელი 11 466-ს შეადგენდა. ლარინა ლალიაშვილის თქმით, ქუთაისში 77-ვე უბანი დროულად, წესების დაცვით გაიხსნა და რაიმე შეფერხება არ დაფიქსირებულა.

ცნობისთვის, ქუთაისში 152 939 ამომრჩეველია რეგისტრირებული.

4 ოქტომბრის თვითმმართველობის არჩევნებში მონაწილეობაზე უარს ამბობს 8 ოპოზიციური პარტია, მათ შორის ის 2 კოალიცია — ცვლილებისთვის და ნაციონალური მოძრაობა, რომლებმაც ცესკო-ს მონაცემებით, 2024 წლის ოქტომბრის არჩევნებში ოპოზიციურ პარტიებს შორის ყველაზე მეტი ხმა მიიღეს.

ბოიკოტის რეჟიმში მყოფი ოპოზიციური პარტიები აცხადებენ, რომ არჩევნებში შესვლა ოცნებისთვის ლეგიტიმაციის მიცემას ნიშნავს და სასურველ ციფრებს ოცნება მაინც დაიწერს. თვითმმართველობის არჩევნების დღეს, 4 ოქტომბერს ოპოზიციური პარტიები და აქტივისტები რუსთაველზე აქციას გამართავენ. ორგანიზატორებს შორის არიან ნაციონალური მოძრაობის და მოძრაობა რუსთაველის გამზირის წარმომადგენლები. ისინი აცხადებენ, რომ ამ დღეს ოცნების ხელისუფლებას "მშვიდობიანად დაამხობენ".