"საერთაშორისო გამჭვირვალობა —საქართველო" 4 ოქტომბერს დანიშნულ თვითმმართველობის არჩევნებს ვერ დააკვირდება. ორგანიზაციის განმარტებით, ქართული ოცნების პირობებში შეუძლებელია არასამთავრობო ორგანიზაციების ფუნქციონირება. მათი განცხადებით, "რეპრესიული გარემო სახიფათო იქნებოდა პოტენციური დამკვირვებლებისათვისაც შექმნილ სიტუაციაში ისინი სრულიად დაუცველნი დარჩებოდნენ ქართული ოცნების ტიტუშკების თავდასხმებისგან".

"2025 წლის 4 ოქტომბრის არჩევნები პირველი შემთხვევა იქნება, როდესაც 25 წლიანი ისტორიის განმავლობაში "საერთაშორისო გამჭვირვალობა — საქართველო" არჩევნებს არ დააკვირდება.

ამის მიზეზი, პირველ რიგში ის რეპრესიული გარემოა, რომელიც ქართული ოცნების ხელისუფლებამ ქართულ სამოქალაქო სექტორს შეუქმნა. როგორც ცნობილია, მიღებულია რამდენიმე კანონი, რომლებიც ქართული არასამთავრობო ორგანიზაციების ფუნქციონირებას შეუძლებელს ხდის და ჯარიმებით და სისხლის სამართლის წესით დევნით გვემუქრება.
არანაკლებ მნიშვნელოვანია ისიც, რომ ამგვარი რეპრესიული გარემო სახიფათო იქნებოდა პოტენციური დამკვირვებლებისათვისაც — შექმნილ სიტუაციაში ისინი სრულიად დაუცველნი დარჩებოდნენ ქართული ოცნების ტიტუშკების თავდასხმებისა და პროვოკაციების წინაშე, ისევე, როგორც მმართველი პარტიის მიერ კონტროლირებული სამართალდამცავი სისტემის მიერ მოგონილი ბრალდებებისგან.

საქართველოში არსებულ კონტექსტში, ეუთოს კოპენჰაგენის დოკუმენტით (1990) გათვალისწინებული პრინციპების დაცვისთვის სამოქალაქო საზოგადოების, სადამკვირვებლო ორგანიზაციებისა და მედიაგარემოს თავისუფლებას გადამწყვეტი როლი აქვს. შესაძლო პოლიტიკური კონკურენტების დისკრედიტაცია და ოპოზიციური პარტიების წევრების პატიმრობაში გაშვება თავისუფალი არჩევნების დამახასიათებელი არაა. სახეზეა გარემო, რომელიც ქართულმა ოცნებამ შექმნა სახელმწიფო ინსტიტუტების მიტაცების გზით და რომლის არსებობის პირობებში გამორიცხულია თავისუფალი, სამართლიანი და კონკურენტული არჩევნების ჩატარება. არჩევნებზე დაკვირვებით ჩვენ არ და ვერ შევქმნით თავისუფალი და სამართლიანი არჩევნების ილუზიას," — განაცხადა ორგანიზაციამ.

წლევანდელ არჩევნებს არც საქართველოს ახალგაზრდა იურისტთა ასოციაცია დააკვირდება. ორგანიზაციის განმარტებით, სამოქალაქო საზოგადოების ორგანიზაციების წინააღმდეგ გატარებული რეპრესიული პოლიტიკიდან გამომდინარე მათთვის შეუძლებელი გახდა სრულფასოვანი სადამკვირვებლო მისიის ჩატარება.

შეგახსენებთ, ეუთო/ოდირი თვითმმართველობის არჩევნებს არ დააკვირდება. ODIHR-ის განცხადებაში ვკითხულობთ, რომ "გამჭვირვალე და სანდო საარჩევნო მონიტორინგს საფუძვლიანი მზადება სჭირდება", რაც ქართული ოცნების მოკლე ვადაში გაგზავნილი მოწვევის გამო ვერ მოხერხდება.