საერთაშორისო გამჭვირვალობა — საქართველოს(TI) ცნობით, დასავლურმა სამყარომ ქართული ოცნების 230-ზე მეტი წარმომადგენელი დაასანქცირა, რომელთაგან 141-ის ვინაობა ცნობილია, ხოლო დანარჩენებზე ანონიმური სავიზო / სამოგზაურო შეზღუდვებია დაწესებული.

TI-ის ინფორმაციით, დასანქცირებულია ბიძინა ივანიშვილი და მისი ოჯახის 4 წევრი; ქართული ოცნების 52 მაღალჩინოსანი; 47 მოსამართლე; 17 პროკურორი; 14 პოლიციელი.

ანონიმური სანქციები (სავიზო შეზღუდვა / ქვეყანაში შესვლის აკრძალვა) 200-ზე მეტ პირს შეეხო.

TI-ის ინფორმაციით, შეერთებულმა შტატებმა — 110-ზე მეტ პირს. მათ შორის: პარტია ქართული ოცნების წევრებს, პარლამენტის წევრებს, მთავრობისა და მუნიციპალური ხელისუფლების მაღალჩინოსნებს, სამართალდამცავ და უსაფრთხოების ჩინოვნიკებს, კორუმპირებულ ბიზნეს ლიდერებს, პროპაგანდისტებს, ზოგიერთ კერძო მოქალაქეს და ყველა ამ პირის ოჯახის წევრებს, ვიზაზე შეზღუდვები დაუწესა. მათი ვინაობა ცნობილი არ არის.

გერმანიამ — ქვეყანაში შესვლა საქართველოს 13 მოქალაქეს აუკრძალა. ეს პირები "პასუხისმგებელნი არიან მომიტინგეებისა და ოპოზიციის წევრების წინააღმდეგ ძალადობაზე".

ლატვიამ — ქვეყანაში შესვლა საქართველოს 84 მოქალაქეს აუკრძალა. მათი ვინაობა ცნობილია.

პოლონეთმა — საქართველოს სამართალდამცავი ორგანოების 8 წარმომადგენელს ქვეყანაში შესვლის აკრძალვა დაუწესა. ეს პირები მომიტინგეების წინააღმდეგ ძალადობაში არიან პასუხისმგებელნი. მათი ვინაობა საჯარო არაა.

2025 წლის 27 იანვარს, ევროპულმა საბჭომ მიიღო გადაწყვეტილება შეეჩერებინა უვიზო რეჟიმი ქართული დიპლომატიური და სამსახურებრივი პასპორტების მფლობელებისთვის.

საერთაშორისო გამჭვირვალობა — საქართველო წერს, რომ აღნიშნული შეზღუდვა სულ მცირე 1000 თანამდებობის პირსა და მათი ოჯახის წევრს შეეხებოდა.

"სავარაუდოა, რომ ეს შეზღუდვა შეეხო სულ მცირე 1000 ქართველ თანამდებობის პირსა და მათი ოჯახის წევრს, იმის გათვალისწინებით, თუ რამდენ თანამდებობის პირს ეკუთვნის დიპლომატიური ან სამსახურებრივი პასპორტები (700-მდე) და რამდენ საჯარო დაწესებულებას აქვს გამოყოფილი კვოტები ასეთი პასპორტების გასაცემად საკუთარ თანამშრომლებზე (200-მდე); ასევე, იმის გათვალისწინებით, რომ პრემიერმინისტრს აქვს უფლება დიპლომატიური პასპორტები საგამონაკლისო წესით გასცეს ნებისმიერ პირზე", — წერს TI.

2025 წლის 13 თებერვლის რეზოლუციით ევროპარლამენტმა კიდევ 31 ადამიანი დაასანქცირა.

TI-ის ცნობით, დასანქცირებულთა შორის არიან:

ბიძინა ივანიშვილი — ქართული ოცნების დამფუძნებელი და საპატიო თავმჯდომარე.

ბიძინა ივანიშვილის ოჯახის წევრები — მეუღლე ეკატერინე ხვედელიძე და შვილები უტა, ცოტნე, ბერა და გვანცა ივანიშვილები; ძმა ალექსანდრე ივანიშვილი; დის შვილი შმაგი კობახიძე; დეიდაშვილი უჩა მამაცაშვილი.

ირაკლი კობახიძე, შალვა პაპუაშვილი, კახა კალაძე, ირაკლი ღარიბაშვილი — პარტია ქართული ოცნების მმართველი პირები.

ვახტანგ გომელაური — შინაგან საქმეთა ყოფილი მინისტრი.

გრიგოლ ლილუაშვილი — სახელმწიფო უსაფრთხოების სამსახურის ყოფილი ხელმძღვანელი.
ნათია თურნავა — ეროვნული ბანკის პრეზიდენტი.

ივანე ჩხარტიშვილი, ილია წულაია, სულხან პაპაშვილი, გიორგი კაპანაძე — ქართულ ოცნებასთან დაახლოებული ბიზნესმენები.

თორნიკე რიჟვაძე — აჭარის მთავრობის ყოფილი თავმჯდომარე.

კახი ბექაური — კომუნიკაციების კომისიის თავმჯდომარე.

ლაშა ნაცვლიშვილი — ქართული ოცნების პროპაგანდისტი.

ვასილ მაღლაფერიძე და თინათინ ბერძენიშვილი — საზოგადოებრივი მაუწყებლის სამეურვეო საბჭოს თავმჯდომარე და გენერალური დირექტორი.

მიხეილ ჩინჩალაძე და ლევან მურუსიძე — სასამართლო "კლანის" ლიდერი მოსამართლეები.

ირაკლი რუხაძე — ქართული ოცნების მთავარი პროპაგანდისტული არხის ტელეკომპანია იმედის მფლობელი.

თამაზ გაიაშვილი — ავიაკომპანია "ჯორჯიან ეარვეისის" მფლობელი.

ანტონ ობოლაშვილი და გოჩა ენუქიძე — ბიზნესმენები და ქართული ოცნების დეპუტატები.

Ti ევროკომისიის სიის შესახებაც წერს და აღნიშნავს, რომ ევროსაბჭოში კონსენსუსის არ არსებობის გამო 15 საქართველოს მოქალაქის, მათ შორის, ორი მოსამართლის სანქცირება გადაიდო.

"2025 წლის 15 ივლისს, ევროკავშირის საგარეო საქმეთა მინისტრების შეხვედრის ფარგლებში, ევროკავშირის საგარეო საქმეთა უმაღლესმა წარმომადგენელმა, კაია კალასმა, ჟურნალისტებს დაუდასტურა, რომ ევროკავშირის საგარეო საქმეთა მინისტრებს ჰქონდათ სანქციებისთვის მზად 15 საქართველოს მოქალაქის სია, რომელშიც ორი მოსამართლე შედიოდა. თუმცა, ევროსაბჭოში კონსენსუსის არარსებობის გამო, სანქციების დაწესების შესახებ გადაწყვეტილების მიღება გადაიდო", — წერია TI-ის მიერ გავრცელებულ ინფორმაციაში.