ყიზილაჯლოში ლელოს ყოფილი მაჟორიტარი კარა ორუჯაევი უარყოფს პარტიის მიერ გავრცელებულ აუდიომასალის ავთენტიკურობას. ორუჯაევის განცხადებით, ლელოს გავრცელებულ აუდიოჩანაწერში ნამდვილად მისი ხმაა, მაგრამ დამონტაჟებულია.

"ჩანაწერში ჩემი ხმა ნამდვილად არის, ადამიანს რომელსაც ველაპარაკები 13 წელია ვიცნობ. არანაირი ფულის საკითხი არ ყოფილა, ეს ყველაფერი ბლეფია. ბევრ კითხვას მისვამდა, რეალურად არ მინდოდა მასთან იმ მიზეზის თქმა, რა მიზეზითაც დავტოვე ლელო. რეალურად მე პარტიით უკმაყოფილო ვიყავი, ბევრი შეცდომა დაუშვეს, მარნეულის პარტიის თავმჯდომარეს ყველაფერი ვუთხარი, გავაფრთხილე, რომ კიდევ თუ დაუშვებდნენ ასეთ შეცდომებს წავიდოდი.

დავინახე, რომ ეს შეცდომები არ გამოასწორეს და წამოვედი. რაც შეეხება შეცდომებს, ბევრი იყო, მაგრამ მათ შორის უკანონოდ აფინანსებდნენ პარტიას რეგიონებში. ამის გამო გავაფრთხილე. ეს იყო ის პრობლემა, რის გამოც ვერ შევთანხმდით. ამის შემდეგ ახლობლებმაც მითხრეს ამ პრობლემის შესახებ და მათგანაც კი არ მოდიოდა მხარდაჭერა. ამიტომაც წამოვედი," — ორუჯაევის კომენტარის თარგმანს რუსთავი 2 ავრცელებს.

გუშინ, ლელო — ძლიერი საქართველოსა და გახარიას პარტიის მერობის ერთობლივმა კანდიდატმა, ირაკლი კუპრაძემ ბრიფინგზე განაცხადა, რომ მოიპოვეს აუდიომასალა, სადაც ჩანს როგორ ცდილობენ გავლენიანი ბიზნესმენები ლელო — ძლიერი საქართველოს მაჟორიტარების მოსყიდვას.