თბილისის საქალაქო სასამართლომ "თანაინვესტირების ფონდის" ყოფილი ხელმძღვანელი გიორგი ბაჩიაშვილი, საზღვრის უკანონო კვეთაში, ხოლო მისი მძღოლი შოთა ქარუმიძე საქართველოს სახელმწიფო საზღვრის უკანონოდ გადაკვეთაში დახმარებისთვის დამნაშავედ ცნო. გადაწყვეტილება მოსამართლე ჯვებე ნაჭყებიამ მიიღო.

გიორგი ბაჩიაშვილს თავისუფლების 4 წლითა და 6 თვით აღკვეთა მიესაჯა, რომელიც ქართული ოცნების დამფუძნებლის, ბიძინა ივანიშვილის კუთვნილი კრიპტოვალუტის მითვისების საქმეზე შეფარდებულმა 11-წლიანმა სასჯელმა შთანთქა.

მას პროკურატურამ საზღვრის უკანონო კვეთის ფაქტზე სისხლის სამართლის კოდექსის 334-ე მუხლის პირველი ნაწილით წარუდგინა. ბაჩიაშვილმა ქვეყანა მანამდე დატოვა, სანამ მას ბიძინა ივანიშვილის კრიპტოვალუტის მითვისების საქმეზე 11-წლიან პატიმრობას მიუსჯიდნენ.

ჯვებე ნაჭყებიას გადაწყვეტილებით, ამავე საქმეზე ბრალდებულ შოთა ქარუმიძეს, რომელიც გიორგი ბაჩიაშვილის სომხეთში გადაყვანის ბრალდებით დააკავეს, 4 წელი და 6 თვე მიესაჯა. მას ბრალდება სისხლის სამართლის კოდექსის 25, 344-ე მუხლის პირველი ნაწილით (საქართველოს სახელმწიფო საზღვრის უკანონოდ გადაკვეთაში დახმარება) წარედგინა, რაც 3-დან 5 წლამდე თავისუფლების აღკვეთას ითვალისწინებს.

ცნობისთვის, პროკურატურის ინფორმაციით, ბაჩიაშვილმა 43 მილიონამდე აშშ დოლარის ღირებულების ბიტკოინი მართლსაწინააღმდეგოდ მიითვისა. მას აღკვეთის ღონისძიების სახით 2 500 000-ლარიანი გირაო ჰქონდა შეფარდებული, თუმცა, ამ საქმეზე, მას გირაო პატიმრობით შეეცვალა. თანხის მითვისების ნაწილში მას 10 წლით თავისუფლების აღკვეთა განესაზღვრა, ხოლო უკანონო შემოსავლის ლეგალიზაციაში — 11 წლით. ამ უკანასკნელმა 10-წლიანი სასჯელი შთანთქა და მას საბოლოოდ, ამ საქმეზე, თავისუფლების აღკვეთა 11 წლით განესაზღვრა.

შეგახსენებთ, "თანაინვესტირების ფონდის" ყოფილ გენერალურ დირექტორს, გიორგი ბაჩიაშვილს, რომელმაც საქართველო 4 მარტს დაატოვა, აღკვეთის ღონისძიების სახით პატიმრობა დაუსწრებლად შეეფარდა. მანამდე პროკურატურამ გიორგი ბაჩიაშვილს საზღვრის უკანონო კვეთის ფაქტზე ბრალდება წარუდგინა.

შსს-ს ცნობით, ბაჩიაშვილმა საქართველოს სახელმწიფო საზღვარი 2 მარტს, სასაზღვრო გამტარი პუნქტის გვერდის ავლით, ავტომობილში მოწყობილი სპეციალური სამალავის საშუალებით, სომხეთის მიმართულებით ფარულად გადაკვეთა. ბაჩიაშვილმა სომხეთში ჩასვლის შემდეგ, სომხეთის სასაზღვრო გამშვებ პუნქტში, მის სახელზე გაცემული რუსეთის ფედერაციის მოქალაქეობის დამადასტურებელი სხვა პასპორტი წარადგინა, რის შედეგადაც გაიარა საზღვარი.

ასევე, პროკურატურამ პატიმრობაში მყოფი "თანაინვესტირების ფონდის" ყოფილი ხელმძღვანელის, გიორგი ბაჩიაშვილის მშობლების მიმართ სისხლისსამართლებრივი დევნა დაიწყო. მათ მიმართ საქმე აღიძრა სისხლის სამართლის კოდექსის 25, 194-ე მუხლის მე-3 ნაწილის "გ" ქვეპუნქტით გათვალისწინებული დანაშაულისათვის, რაც სასჯელის სახედ და ზომად 9-დან 12 წლამდე ვადით თავისუფლების აღკვეთას ითვალისწინებს. მანამდე ბაჩიაშვილის მშობლებს საბანკო ანგარიშები გაუყინეს.

ასევე იხილეთ: