საქართველოს ბანკი, როგორც განათლების მთავარი მხარდამჭერი ბანკი ახალგაზრდებისთვის განათლების მიღების ახალი შესაძლებლობების შექმნას განაგრძობს. სწორედ ამ მიზნით, Miami Ad School-თან თანამშრომლობით, ნიკა გუჯეჯიანის სახელობის სასტიპენდიო პროგრამა შექმნა.

ინიციატივის ფარგლებში, ბანკი შესაძლებლობას აძლევს ახალგაზრდა პროფესიონალებს, ჩააბარონ Miami Ad School Europe-ის პორტფოლიო პროგრამაზე და ისწავლონ სრული დაფინანსებით.

წელს, ნიკა გუჯეჯიანის სახელობის სტიპენდიის გამარჯვებული ლინუკა ლომთათიძე გახდა და ოქტომბრიდან არტ-დაირექშენის მიმართულებით ისწავლის.

“არასდროს წარმომედგინა, რომ ოდესმე ამ კონკურსში გავიმარჯვებდი. მაგრამ რამდენიმე თვით ადრე მიზნად დავისახე, ბოლომდე მებრძოლა. ჩემი შესაძლებლობების მაქსიმუმი გამოვიყენე და, საბოლოოდ, დიდი ხნის ოცნება რეალობად გადაიქცა”, — აღნიშნავს ლინუკა.

ლინუკა დარწმუნებულია, რომ საერთაშორისო განათლება მას ახალ ჰორიზონტებს გაუხსნის და შეძლებს საკუთარ პატარა სამყაროსა და გლობალურ კრეატივს შორის საზღვრები გადალახოს.

ჟინი, რომელიც მიზნამდე მიგიყვანს

ჟინი, რომელმაც ლინუკა გამარჯვებამდე მიიყვანა, მისთვის დღესაც ყველაზე ძლიერი მოტივაციაა. თუმცა, ეს მხოლოდ დასაწყისია.

“ჩემთვის ჟინი ნიშნავს მწველ სურვილს, რომელიც არ გაჩერებს და სულ ახალ მიზნებს გთავაზობს. ის იწვევს გულის ფრთაშესხმულ აჩქარებას, როცა მიზანი გაშინებს, მაგრამ მისთვის მაინც ყველაფერს დათმობ”, — გვიყვება ლინუკა.

სწორედ ამიტომ, იმ ახალგაზრდებს, რომლებსაც პროფესიულ ცხოვრებაში განვითარება სურთ, ურჩევს, აუცილებლად გადადგან ეს ნაბიჯი.

“არასდროს დანებდეთ! რაც უნდა გითხრან, რომ არ გამოვა ან სიგიჟეა, არავის მოუსმინოთ. მოუსმინეთ მხოლოდ საკუთარ გულს. ყველა და ყველაფერი დაივიწყეთ და ბოლომდე იბრძოლეთ, რადგან, როცა ძალისხმევას არ იშურვებ, ამას სამყარო არასოდეს გიკარგავს, ყველაფერი უკან გიბრუნდება. ყველა სიგიჟე, რომელიც გულით გინდა, აუცილებლად ახდება”, — ამბობს ლინუკა.

პორტფოლიო, რომელმაც მას წარმატება მოუტანა, შეგიძლია, ნახო ვებგვერდზე.

ლინუკას ამბავი იმის დასტურია, რომ დიდი ოცნებებიც კი რეალობა ხდება, როცა მას მთელი გულითა და მონდომებით ემსახურები.

მიუხედავად იმისა, რომ 2025 წლის განაცხადების მიღების ვადა უკვე დასრულებულია, შეგიძლიათ, დაიწყოთ მომავალი წლისთვის მზადება. პროექტის შესახებ დეტალური ინფორმაციის მისაღებად ეწვიეთ ვებგვერდს.