27 სექტემბერს, სოხუმის დაცემიდან 32 წლისთავზე, საქართველოს კინოთეატრებსა და Cavea plus-ზე ფილმ "სოხუმის" პრემიერა გაიმართა, რომელშიც ერთ-ერთ როლს სინდისის პატიმარი, მსახიობი ანდრო ჭიჭინაძე თამაშობს. ფილმის პრემიერას საქართველოს მე-5 პრეზიდენტი სალომე ზურაბიშვილიც დაესწრო.

რეჟისორ გიორგი ბარაბაძის ფილმი სოხუმის დაცემის ბოლო დღეებზე მოგვითხრობს, რომელშიც საომარ მდგომარეობაში მყოფ ადამიანებს, პირად ტრაგედიებს, გმირობებს და 1990-იანი წლების პოლიტიკურ პერიპეტიებზე ისტორიებს შევხვდებით.

"ეს ფილმი არ არის მხოლოდ პოლიტიკოსებზე, პირველ რიგში არის ადამიანებზე, მათ შორის პოლიტიკოსების ადამიანურ მხარეზე. ჩვენ გვყავდა გმირები და აუცილებელია, რომ მათ შესახებ მომავალმა თაობამ იცოდეს. სხვათა შორის, პირველი ეკრანიზაციაა მხატვრული ნამუშევრის სახით, სადაც ეკრანზე მაყურებელი ნახავს ჩვენი ქვეყნის ეროვნულ გმირებს ჟიული შარტავას და გურამ გაბესკირიას. ჩემი აზრით, მნიშვნელოვანია, რომ მომავალმა თაობამ რომელიც ახლაც თავის ბრძოლას გადის, ნახოს და შეაფასოს "სოხუმი" — განაცხადა გიორგი ბარაბაძემ.

ფილმში ედუარდ შევარდნაძის როლს მსახიობი გოგა პიპინაშვილი ასრულებს, ზვიად გამსახურდიას — თემიკო ჭიჭინაძე, ჟიული შარტავას — დავით ბეშიტაშვილი, გურამ გაბესკირიას — ვანიკო თარხნიშვილი. ეკრანებზე ასევე იხილავთ მსახიობებს: ანდრო ჭიჭინაძეს, პაატა ინაურს, შაკო მირიანაშვილს, ვერონიკა კალანდარიშვილს, თამუნა ნიკოლაძეს და ზალიკო ჩიქობავას და ა.შ..

ფოტო: Cavea+

პრემიერაზე მსახიობმა ირაკლი ჯაფარიძემ ანდრო ჭიჭინაძის ციხიდან გამოგზავნილი წერილი წაიკითხა.

"მადლობელი ვარ, რომ ამ პროექტში მონაწილეობის საშუალება მომეცა. ჩემთვის უმნიშვნელოვანესი და საპასუხისმგებლო ის იყო და არის, რომ ჩვენ ამ ფილმით საქართველოს უახლეს ისტორიაზე ვლაპარაკობთ. იმ ისტორიაზე, რომელიც დღევანდელობაზე უშუალოდ მოქმედებს და განსაზღვრავს. მათ შორის ფაქტებზეც, რომლის გამომწვევ მიზეზებზე დღემდე შეთანხმებულები არ ვართ.

ისტორიის გადაფასების გარეშე სწორი განვითარება შეუძლებელია. ძალიან მიხარია ამ პროექტის ნაწილი, რომ გავხდი, იმ საინტერესო შემოქმედებითი პროცესის, რომელიც გარდაისახა იმაში რასაც ნახავთ. მე ცოტა ვიყალთაბანდე და სასამართლოზე ნაწყვეტები ვნახე და კიდევ უფრო დამაინტერესა. ყველას ძალიან დიდი მადლობა მინდა გადავუხადო, ვინც ამ პროექტზე იმუშავა. წარმატებას ვუსურვებ ფილმს, რომლის ირგვლივ საზოგადოების ინტერესმა კიდევ უფრო მეტად დამანახა ხალხის მხარდაჭერა. გიას და ქეთის მინდა ვუთხრა, რომ ჩემთვის საამაყო მეგობრები არიან," — წერს ანდრო ჭიჭინაძე.