ინგლისელი მსახიობი ემა უოტსონი, რომელსაც მსოფლიოში ყველაზე მეტად ჰარი პოტერში შესრულებული ჰერმიონ გრეინჯერის როლით იცნობენ, სერიის შემქმნელთან, ჯოან როულინგთან, ბოლო წლებში დაძაბულ ურთიერთობაზე საუბრობს. მწერლისა და მსახიობის უთანხმოება მაშინ დაიწყო, როცა 2020 წელს როულინგმა X-ზე (ყოფილ ტვიტერზე) და მოგვიანებით 3600-სიტყვიან ესეში თავისი შეხედულებები გამოთქვა გენდერის საკითხებზე. პოტერიადის ავტორი მაშინ ტრანსფობიაში დაადანაშაულეს და მასთან გასამიჯნად ჰარი პოტერის არაერთმა ვარსკვლავმაც გააკეთა კომენტარი, მათ შორის, ემა უოტსონმა.

"ტრანსგენდერი ადამიანები ისინი არიან, როგორც ამას თავად ამბობენ და იმსახურებენ, ისე იცხოვრონ, რომ გამუდმებით კითხვის ნიშნის ქვეშ არ აყენებდნენ მათ თვითიდენტიფიკაციას", — დაწერა მაშინ მსახიობმა სოციალურ ქსელში.

რადგან ბოლო წლებში უოტსონი საზოგადოების ყურადღების ცენტრიდან გაქრა, პოდკასტერ ჯეი შეტისთან უახლეს ინტერვიუში მას ჰკითხეს, რას ფიქრობს როულინგის განცხადებებზე; მათ შორის, იმ განცხადებაზე, რომ პოტერიადის მსახიობებს "არასდროს აპატიებს" და რომ მათ გამო ფილმებისადმი ინტერესიც დაკარგა.

"არ მგონია, ეს გამოცდილება და ის სიყვარული, მხარდაჭერა და შეხედულებები, რომლებიც გამაჩნია, იმას ნიშნავდეს, რომ არ და ვერ დავაფასებ ჯოს [როულინგს] და იმ ადამიანს, რომელთანაც პირადად მქონდა ურთიერთობა. არ მიმაჩნია, რომ ერთი მეორეს გამორიცხავს და არჩევანი უნდა გავაკეთო", — აღნიშნავს უოტსონი, — "მთელი გულით ვისურვებდი, რომ კვლავ ვუყვარდე ადამიანებს, რომლებიც ჩემს აზრს არ იზიარებენ და, იმედი მაქვს, მოვახერხებ, ისევ მიყვარდეს ხალხი, რომელთაც შეიძლება არ ვეთანხმებოდე".

მსახიობის თქმით, ყველაზე მეტად ის სწყვეტს გულს, რომ ამ საკითხებზე "საუბარი ვერ მოახერხეს". აქ მას წამყვანი ჩაეკითხა, თავად თუ კიდევ არის მზად დიალოგისთვის.

"კი და ყოველთვის ვიქნები", — უპასუხა უოტსონმა, — "ამის მჯერა".

ფოტო: Getty Images

უოტსონს სამსახიობო კარიერაში პაუზა აქვს აღებული. ამ დროისთვის ბოლო როლი ემამ გრეტა გერვიგის 2019 წლის ფილმში პატარა ქალები შეასრულა. 2023 წელს უოტსონმა თავის ძმასთან ერთად ჯინის ბრენდიც დააფუძნა. მსახიობი, რომელიც ამჟამად ოქსფორდის უნივერსიტეტში შემოქმედებითი წერის სამაგისტრო პროგრამაზე სწავლობს, ამბობს, რომ როლის შესრულება ენატრება, მაგრამ "ახლა იმაზე ბედნიერი და ჯანმრთელია", ვიდრე ოდესმე ყოფილა.

"სამსახიობო საქმეში თავად როლის შესრულებაზე უფრო დიდი ნაწილი რეკლამირებას უკავია: როგორ გაყიდო ეს ნამუშევარი", — ამატებს მსახიობი, — "გულწრფელად გეტყვით, რაღაცების გაყიდვა არ მენატრება. ეს ნაწილი ძალიან მომაბეზრებელი მგონია".

რა ხდება როულინგის თავს

ფოტო: Getty Images

იმის მიუხედავად, რომ ჰარი პოტერი წლების შემდეგაც რჩება ფანების საყვარელ ისტორიად, ბოლო წლებში საგის ავტორი, ჯოან როულინგი, კრიტიკის სამიზნეში არაერთხელ მოხვდა. მიზეზად დიდწილად მისი შეხედულებები იქცა — მწერალი ბევრჯერ დაადანაშაულეს ტრანსფობიაში.

თავდაპირველად, ამის საფუძველი მკვლევარ მაია ფორსტეიტერის დაცვა გახდა. ეს უკანასკნელი სამსახურიდან ტრანსფობიური განცხადების — "კაცებს ქალად გახდომა არ შეუძლიათ" — გამო დაითხოვეს. მოგვიანებით, როულინგმა ტვიტერზე დაწერა, რომ "ადამიანებისთვის, რომელთაც მენსტრუაცია აქვთ, შესაფერისი სიტყვა უკვე არსებობს". შემდეგ, მწერალი თავის დეტექტიურ რომანში ბოროტმოქმედად "ქალად გადაცმული კაცის" გამოყვანისთვის გააკრიტიკეს.

კრიტიკამ კი სხვადასხვაგვარი ფორმა მიიღო — ტიკტოკის მომხმარებლები ჰარი პოტერის წიგნებსაც კი წვავდნენ. 2021 წელს როულინგმა ტვიტერზე ასევე დაწერა, რომ თავისი სახლის მისამართი "სამმა აქტივისტმა" გაასაჯაროვა. ეს ფაქტი სოციალური ქსელის ადმინისტრაციამ და შოტლანდიის პოლიციამ აღკვეთეს, თუმცა, მწერლის თქმით, მან სიკვდილის მუქარებიც კი მიიღო.

ავტორისადმი "მიმართული სიძულვილის ტალღა" არაერთმა ცნობილმა ადამიანმა, მათ შორის, ჯადოსნური არსებების მსახიობმა ედი რედმეინმა დაგმო.

2021 წელს როულინგმა ტვიტერზე სტატიაა გააზიარა, სადაც ნათქვამი იყო, რომ "პოლიცია კაცის გენიტალიების მქონე გამაუპატიურებელს ქალად აღნიშნავს, თუკი თავდამსხმელი საკუთარ თავს ქალად აიდენტიფიცირებს".

"ომი მშვიდობაა. თავისუფლება ტყვეობაა. უგუნურება ძალაა. პენისიანი ინდივიდი, რომელმაც გაგაუპატიურა, ქალია", — დაწერა მწერალმა პოსტის აღწერაში.

მწერალთან გასამიჯნად ქვიდიჩის მსოფლიო ასოციაციებმაც გადაწყვიტეს სახელის შეცვლა. ავტორი დაადანაშაულეს ანტისემიტიზმშიც.

2022 წლის აგვისტოში, როცა მწერალ სალმან რუშდის აშშ-ში თავს დაესხნენ და ფიზიკურად გაუსწორდნენ, მოკვლით დაემუქრნენ ჯოან როულინგსაც.

ამ ყველაფრის მიუხედავად, ჰარი პოტერის სამყარო იზრდება: HBO-მ პოტერიადის მიხედვით სერიალის გადაღებები ამ ზაფხულს დაიწყო. პროექტის აღმასრულებელი პროდიუსერი სწორედ როულინგია.