"ზელენსკიმ მიხედოს თავის ქვეყანას და ისაუბროს იმაზე, თუ რა დაკარგა, რა მოუწყო საკუთარ ხალხს და საკუთარ ქვეყანას," — ამის შესახებ თბილისის მერმა და კანდიდატმა კახა კალაძემ ჟურნალისტებთან თქვა, რითიც გამოეხმაურა გაეროს გენერალურ ასამბლეაზე უკრაინის პრეზიდენტის, ვოლოდიმირ ზელენსკის მიერ გაკეთებულ განცხადებას იმის შესახებ, რომ "ევროპამ დაკარგა საქართველო და ის უკვე რუსეთზეა დამოკიდებული".

მერი კალაძე ომში მყოფი ქვეყნის ლიდერზე ამბობს, რომ "გავა დრო და პასუხის გაცემა მოუწევს"

"საქართველოს დაანებოს ყველამ თავი! ზელენსკიმ მიხედოს თავის ქვეყანას და ისაუბროს იმაზე, თუ რა დაკარგა, რა მოუწყო საკუთარ ხალხს და საკუთარ ქვეყანას. იმაზე დიდი უბედურება, რაც უკრაინაში ხდება მისი უშუალო მონაწილეობით, მისი უშუალო ჩართულობით— ამაზე რა თქმა უნდა, გავა დრო და მოუწევს პასუხის გაცემა. ჩვენს ქვეყანას და ქართველ ხალხს თავი დაანებონ. ჩვენ ჩვენს ქვეყანასაც მივხედავთ, მშვიდობასაც დავიცავთ და ქვეყნის ეკონომიკურ განვითარებასაც მოვახდენთ," — თქვა კალაძემ.

ცნობისთვის, უკრაინის პრეზიდენტმა, ვოლოდიმირ ზელენსკიმ გაერო-ს გენერალურ ასამბლეაზე სიტყვით გამოსვლისას განაცხადა, რომ "ევროპამ საქართველო დაკარგა". მისი თქმით, საქართველოში ადამიანის უფლებებისა და სახელმწიფო სისტემის ევროპული ბუნების შევიწროება ხდება და საქართველო რუსეთზეა დამოკიდებული.

"ევროპაში უკვე დავკარგეთ საქართველო — ადამიანების უფლებები სახელმწიფო სისტემის ევროპული ბუნება იქ მხოლოდ მცირდება. საქართველო რუსეთზეა დამოკიდებული.

მნიშვნელოვანია გვახსოვდეს როგორ უგულებელყო მსოფლიომ საქართველოსთვის დახმარების საჭიროება რუსეთის თავდასხმის შემდეგ.

მოლდოვა რუსეთის ჩარევისგან თავს იცავს და არ შეიძლება ევროპამ დაუშვას მოლდოვის დაკარგვაც," — განაცხადა ვოლოდიმირ ზელენსკიმ.