"არ ვიცი რის დაკარგვაზე საუბრობს, ადამიანმა თავისი ქვეყნის 40% დაკარგა, თავისი მოსახლეობის ასობით ათასი ადამიანი დაიღუპა" — ასე ეხმაურება ოცნების პარლამენტის თავმჯდომარე შალვა პაპუაშვილი გაეროს გენერალურ ასამბლეაზე უკრაინის პრეზიდენტის, ვოლოდიმირ ზელენსკის განცხადებას, რომ "ევროპამ დაკარგა საქართველო და ის უკვე რუსეთზეა დამოკიდებული".

შალვა პაპუაშვილი ომში მყოფ პრეზიდენტს "ტრაგიკულ პიროვნებას" უწოდებს და ამბობს, რომ ზელენსკი "უმადურობას" იჩენს. მისივე თქმით, ვოლოდიმირ ზელენსკის "პასუხს თავის დროზე უკრაინელი ხალხი გასცემს".

"ბატონი ზელენსკი ტრაგიკული პიროვნება არის, არამხოლოდ იმიტომ რომ მის ქვეყანაში ომი მიმდინარეობს, არამედ როგორც ხდება ეს ყველაფერი ამიტომ არის ტრაგიკული. არ ვიცი რის დაკარგვაზე საუბრობს, ადამიანმა თავისი ქვეყნის 40% დაკარგა, თავისი მოსახლეობის ასობით ათასი ადამიანი დაიღუპა და საკუთარი ოფიციალური სტატისტიკითვე 40% მოსახლეობის გაქცეული არის ქვეყნიდან და ფაქტობრივად ეს მოსახლეობაც დაკარგა იმიტომ რომ რთულია ალბათ წარმოიდგინო, რომ ეს რაოდენობა მოქალაქეებისა უკან დაბრუნდება, რომლებიც უკვე რამდენიმე წელია გავიდნენ უკრაინიდან, სადღაც დაფუძნდნენ და დიდი ალბათობით იქაც დარჩებიან, ასე რომ, ეს არის ის დანაკარგები, რომელსაც ბატონი ზელენსკი განიცდის.

მე ერთ რამეს ვიტყოდი, ჩვენი დამოკიდებულება ცნობილია, ომში არის უკრაინა და ჩვენ ვერიდებით ზედმეტ კომენტარებს ან ზედმეტ შეფასებებს, მიუხედავად იმისა, რომ ზელენსკის სპეციალურმა სამსახურებმა შემოგვიგზავნეს აქ სააკაშვილი იმისთვის, რომ საქართველო აერიათ, ეს გაგვიკეთა ჩვენ უკრაინის ხელისუფლებამ. მიუხედავად იმისა, რომ აღმოჩნდა, რომ აქ ასაფეთქებელი ნივთიერებების გატარება უნდათ საქართველოში, თუ ჩამოტანა უნდათ საქართველოში, ამას გვიშვრება მისი ხელისუფლება, რომ აქ შეიძლება აიწიოს ნახევარი ქალაქი იმის გამო, რომ საკუთარი მიზნები აქვთ, მიუხედავად იმ ყველაფრისა, რასაც ქართველ ხალხს უკეთებს ბატონი ზელენსკი, ჩვენ მაინც თავს ვიკავებთ, თუმცა მე მექნებოდა ორი რჩევა, პირველი — გაითვალისწინოს ამერიკის შეერთებული შტატების პრეზიდენტის რჩევა და ჩაატაროს არჩევნები, ვინაიდან ჩვენს გასაცემ პასუხს, მას გასცემს უკრაინელი ხალხი იმ ქართველი ხალხის დაზიანებისთვის და მცდელობისთვის, რასაც მისი მხრიდან ვხედავთ, მას თავის დროზე პასუხს გასცემს უკრაინელი ხალხი. ჩაატაროს არჩევნები და მეორე — გაითვალისწინოს ამერიკის ვიცეპრეზიდენტის რჩევა და იყოს მადლიერი. უმადურობა, მით უმეტეს, როცა ომში არის ქვეყანა, არის ძალიან ცუდი და როდესაც ბატონი ზელენსკი ირჩევს უმადურობას საქართველოს ხელისუფლების მიმართ, რომელიც უკრაინელ ხალხს გვერდში უდგას ყველაფერში, ჰუმანიტარული დახმარებით, საერთაშორისო განცხადებებზე და ინსტრუმენტებზე მიერთებით, ყველაფერში გვერდში ვუდგავართ, ეს არის დიდი უმადურობა საქართველოს ხელისუფლების, ქართველი ხალხის ხელისუფლების მიმართ, რასაც ბატონი ზელენსკი იჩენს. მას თუ მეტი არაფერი სათქმელი არ ჰქონდა, რომ ის მცირე დრო რაც გამოყოფილი აქვს გაეროს გენერალურ ტრიბუნაზე გამოსასვლელად , რომ გამოეყენებინა კიდევ ერთხელ და საქართველო ეხსენებინა, ესეც აჩვენებს საბოლოო ჯამში, რომ რამდენად მავნე მიზნები აქვს ზოგიერთს საქართველოს მიმართ," — თქვა პაპუაშვილმა.

ცნობისთვის, უკრაინის პრეზიდენტმა, ვოლოდიმირ ზელენსკიმ გაერო-ს გენერალურ ასამბლეაზე სიტყვით გამოსვლისას განაცხადა, რომ ევროპამ საქართველო დაკარგა და არ შეიძლება იგივე დაუშვას მოლდოვაზეც.

"ევროპაში უკვე დავკარგეთ საქართველო — ადამიანების უფლებები სახელმწიფო სისტემის ევროპული ბუნება იქ მხოლოდ მცირდება. საქართველო რუსეთზეა დამოკიდებული.

მნიშვნელოვანია გვახსოვდეს როგორ უგულებელყო მსოფლიომ საქართველოსთვის დახმარების საჭიროება რუსეთის თავდასხმის შემდეგ.

მოლდოვა რუსეთის ჩარევისგან თავს იცავს და არ შეიძლება ევროპამ დაუშვას მოლდოვის დაკარგვაც," — განაცხადა ვოლოდიმირ ზელენსკიმ.